Картоп тапшылығы: Баға тағы да қыспаққа ала ма?

Былтыр көкөністер, әсіресе картоп күрт қымбаттап, бағы құбылған еді. Биыл тағы сол олқылық қайталануы мүмкін бе? Үкімет отырысының қорытындысы бойынша өткен баспасөз мәслихатында Ауыл шаруашылығы министрі Айдарбек Сапаров осы сұраққа жауап берді, деп жазады Egemen.kz.

Фото: Zakon.kz

«Біз әрдайым көкөністердің, оның ішінде картоптың бағасына болжам жасап отырамыз. Мысалы, былтыр бағаның өсуіне шет мемлекеттен сұраныстың көптігі әсер етті. Экспорт көлемі 600 мың тоннадан асты. Осыны ескере отырып, біз биыл картоп алқаптарын ұлғайттық. Нәтижесінде биыл қосымша 2 млн 900 мың тонна картоп алып отырмыз», деді министр.

Оның айтуынша, қазір жергілікті жерде шаруалар картоптың килосын 110-120 теңгеден саудалап жатыр. Ал дүкендердегі орта баға – 180-185 теңге шамасы.

«Осы нәтижені басшылыққа алсақ, биыл елде картоп бағасы тұрақты болуға тиіс. Себебі нақ қазір біз ішкі нарықты толтырып жатырмыз. Демек, барлығы ойдағыдай болуы керек», дейді Айдарбек Сапаров.