Кәсіптік білім экономиканың драйвері

Биыл Алматы колледждеріндегі шеберханаларды жөндеуге қала бюджетінен 2,4 млрд  теңге бөлінді.

Соның ішінде алты колледждің материалдық-техникалық базасы толық жаңартылды. Бұл туралы «Жұмысшы мамандықтары жылын» қорытындылауға арналған форумда айтылды. Қазір Алматыдағы кәсіптік колледждерде 90 мыңға жуық студент білім алып жатыр.

Таңшолпан Төлендиева Алматыдағы колледждердің бірінде өндірістік оқыту шебері болып істейді. Жуырда Германияда біліктілігін арттырып қайтты. Германия автомобиль өндірісінен алғашқы бестікке кіреді. Таңшолпан неміс мамандарынан электрлі немесе гибридті машиналарды жөндеудің заманауи тәсілін үйреніп қайтыпты. Нәтижесінде өзі істейтін білім ошағына Electude интерактивті оқу бағдарламасы енгізілген.

Таңшолпан Төлендиева, Колледждің өндірістік оқыту шебері:

- Симулятор арқылы жалпы көліктің ақауын тауып, оны жөндеу жұмыстарын жасап, ауыстыратын бөлшектерді ауыстырып, жалпы ол бағдарламада көп жұмыстар жасауға болады. Автокөлік жөндеу және қызмет көрсету саласына өте ыңғайлы, тиімді бағдарлама.

Цифрландыру, ЖИ пайда болғалы еңбек нарығы жылдам өзгеріп жатыр. Сондықтан оқу бағдарламалары да заманға лайық болуы тиіс. Қазір қаладағы 88 кәсіптік колледжде 90 мыңға жуық студент білім алып жатыр. Олардың теориялық білімін тәжірибемен ұштастыру үшін кәсіпорындармен 121 келісім жасалған. Халықаралық ынтымақтастыққа ерекше көңіл бөлінеді. Биылдың өзінде колледждердің 132 оқытушысы  АҚШ, Қытай және Сингапурда білімдерін жетілдіріп қайтты.

Сәкен Аралбаев, Қалалық Білім басқармасы басшысының орынбасары:

- Сапалы мамандар дайындау үшін оған қолайлы жағдай орнату керек. Соған да байланысты Алматы қаласы әкімдігінің бастамасымен биылғы жылы біздің кәсіптік білім беру ұйымдарын толықтай қажетті құрал-жабдықтармен жабдықтауға 100 пайыз қол жеткізілді. Соның нәтижесінде біздің осы бағыттағы жұмыстарымыз оң нәтижесін беріп отыр.

Ұстаздардмен қатар бірқатар студент шетелде тәжірибеден өтіп жатыр. Биыл 110 студент Қытайда біліктілігін арттырса, 16 студент Германиядан тәлім алып қайтыпты. Қалалық форум аясында кәсіптік білімді дамытуға үлес қосқан мамандар мен республикалық WorldSkills чемпионатында топ жарған студенттер марапатталды.

Авторлары: Аршын Кемелжан, Әбен Нарымбаев