Каспий құбырына шабуыл жасалды: залалдың көлемі әлі есептелген жоқ

АСТАНА, 4 желтоқсан – Sputnik. Қазақстанның энергетика вице-министрі Ерлан Акбаров Каспий құбыр консорциумына қатысты сұрақтарға жауап берді.

"Бұл жағдай үкіметтің ерекше бақылауында. Қазіргі уақытта мұнай тасымалдау үздіксіз жүріп жатыр. Бір айлақ толықтай жұмыс істеп тұр, ал екіншісін жүйеге қосу жұмыстары жүргізіліп жатыр. Қазіргі уақытта тасымалдау бойынша шектеу жоқ", - деді Акбаров.

Келтірілген залалға келетін болсақ, әзірге нақты сан жоқ, деп атап өтті энергетика вице-министрі. Украинамен байланыс Сыртқы істер министрлігінің құзыретінде екенін, бұл мәселе шешіліп жатқанын қайталады.

"Энергетика министрлігі келіссөз жүргізуге уәкілетті емес", - деді Акбаров.

29 қарашада Украина Каспий құбыр консорциумының инфрақұрылымына шабуыл жасады. Қазақстан мұнайдың 80%-ын осы құбыр арқылы экспорттайды, ал мұнай – ел бюджетінің негізі.

30 қарашада Қазақстан Сыртқы істер министрлігі Украинаның нысаналы шабуылына наразылық білдірді.