Казак қылышынан қаза тапты

Ақтөбе облысында сот 60 жастағы әйелді казак қылышымен жасалған соққыдан ер адамның өліміне себепкер болғаны үшін екі жылға бас бостандығын шектеу жазасына кесті, деп хабарлайды Arasha.kz.

Тергеу мәліметтері бойынша, қайғылы оқиға Құрайлы ауылында болған. Үй иесі мен оның екі қонағы спирттік ішімдік ішкен. Кейінірек әйел демалу үшін жатын бөлмеге барып жатқан.

«Криминальный Казахстан» Telegram-арнасының хабарлауынша, бірге ішімдік ішкен ер адамдардың бірі оның соңынан барып, әйелді ұрып жіберген де, казак қылышын алып, оңды-солды сермей бастаған. Үй иесі агрессивті қонақты сабырға шақырмақ болғанымен, ол сөзге құлақ аспаған.

Осыдан кейін екеуара жанжал басталған. Әйел қаруды тартып алуға тырысып, қылыштың жүзі мен сабынан ұстаған. Жұлқысу кезінде қылыштың ұшы ер адамның беліне кіріп кеткен. Ол көп қан жоғалту салдарынан оқиға орнында көз жұмды.

Бастапқыда айыптау тарапы әйелдің әрекетін «Адам өлтіру» бабымен бағалаған. Алайда сот істің мән-жайын қайта қарап, оны «Абайсызда өлімге соқтыру» бабына өзгертті. Судьялар бірнеше факторды ескерді: сотталушының жасы, оның жараланған адамға көмектеспек болғаны және марқұмның өзінің агрессивті мінез-құлқы.

Алқабилер соты белгілі бір шарттарды орындау міндетімен екі жылға бас бостандығын шектеу туралы шешім шығарды.