Кездейсоқтық па, әлде қара пиар ма? сарапшы қазақстандық тауарларға жасалған шабуылдарды зерттеуге шақырды

Саяси шолушы Ғазиз Әбішевтің пікірінше, қазақстандық өнімдерге жасалған ақпараттық шабуылдарды егжей-тегжейлі зерттеу қажет, деп хабарлайды Tengrinews.kz. Оның ойынша, мұндай жағдайлар кездейсоқтық па, әлде отандық өндірушілерді нарықтан ығыстыру әрекеті ме, соның басын ашып алу керек.

Кездейсоқтық па, әлде қара пиар ма?

Премьер-министр Олжас Бектеновтің қазақстандық тауарларға қарсы бағытталған ақпараттық науқандар туралы сөзіне пікір білдіре отырып, Әбішев "Қазақстан" шоколады төңірегіндегі кейінгі жағдайды еске салды.

"Жақында ғана танымал бренд "Қазақстан" шоколадына ақпараттық шабуыл жасалды. Ұсақ-түйек жайттардың өзі әсіреленіп, көбіне бірнеше адам арқылы жеткен субъективті әсерлер қалың жұртшылыққа істің нақты жағдайы ретінде ұсынылды. Арнайы тексеріс нәтижесінде ешқандай кінәрат табылмады. Дегенмен, көңілде күдік қалды", - деп жазды Әбішев Telegram-арнасында.

Ол Бектеновтің бәсекелесті ығыстырып, нарықты иемденіп қалу мақсатында танымал қазақстандық өнімдердің беделін түсіру әрекеттері туралы айтқанда, дәл осы жағдайды меңзеген болуы мүмкін деп топшылайды.

"Бұл мәселеге қатысты терең зерттеу жүргізу керек деп есептеймін. Болған жағдай кездейсоқтық па, әлде әдейі ұйымдастырылған қара пиар ма, соны анықтау қажет. Мемлекет салық төлеп, жұмыс орындарын ашып, нарықты өз өнімімен қамтамасыз етіп отырған өз өндірушілерін қорғауы тиіс", - деді Әбішев.

Сарапшы қазақстандық өндірісті қолдау тек ақпараттық саламен шектелмеуі керек деп санайды. Оның пікірінше, елде "жұмсақ экономикалық ұлтшылдық" құралдарын қолданған жөн. Атап айтқанда, ол қазақстандық өндірушілерге сауда желілеріндегі тауарлар ең көп көрінетін "прайм-сөрелерге" оңайырақ қол жеткізуге мүмкіндік беретін шаралар әзірлеуді ұсынады.

Сондай-ақ, оның ойынша, дүкендерді өздері қызмет етіп жатқан елдің экономикасына неғұрлым жауапкершілікпен қарауға ынталандыру қажет.

Еске сала кетейік, бұған дейін премьер-министр Олжас Бектенов Үкімет отырысында қазақстандық өндірушілердің сауда алаңдарына қолжетімділігі шектеулі екенін, оның ішінде жалдау құнының жоғарылығын айтқан болатын. Ол отандық өндірушілерге неғұрлым қолайлы жағдай жасау тетіктерін әзірлеуді тапсырды.

Сонымен қатар Үкімет басшысы "Қазақстанда жасалған" ұлттық брендін ілгерілету және отандық тауарларды негізсіз ақпараттық шабуылдардан қорғау бойынша бірыңғай ақпараттық науқан жүргізуді тапсырды.

Google News арқылы жаңалықтарымызды қадағалаңыз