Моральдық тұрғыдан дұрыс емес : Бектенов қазақстандық тауарларға деген көзқарасты қайта қарауға шақырды

Премьер-министр Олжас Бектенов сауда желілерінің иелерін қазақстандық өнімдерге деген көзқарасты қайта қарауға шақырды. Бұл туралы ол үкімет отырысында мәлімдеді, деп хабарлайды Tengrinews.kz тілшісі.

Үкімет басшысының айтуынша, отандық халық тұтынатын тауарларды өндірушілер көбіне сауда алаңдарына қол жеткізе алмай қиналады, оған жалға алу құнының жоғарылығы да себеп.

Бектеновтің айтуынша, бұл ішкі нарықтағы қазақстандық өнімдер үлесінің артуын тежейді және оның бәсекеге қабілеттілігін төмендетеді.

"Сауда желілерінің иелері қазақстандық тауарларға деген көзқарасын қайта қарауы керек деп есептеймін. Отандық өнімге зиян келтіре отырып, импорттық тауарларға басымдық беру құқықтық тұрғыдан ғана емес, моральдық тұрғыдан да дұрыс емес", – деді Бектенов.

Премьер-министр Сауда министрлігіне мүдделі мемлекеттік органдармен, өңір әкімдіктерімен және "Атамекен" палатасымен бірлесіп, барлық санаттағы отандық тауар өндірушілерге сауда алаңдарын жалға алудың қолайлы шарттарын ұсынудың нақты тетіктерін әзірлеуді тапсырды.

Атап айтқанда, сөз жеңіл өнеркәсіп және тұрмыстық химия өнімдерін өндірушілер туралы болып отыр.

Google News арқылы жаңалықтарымызды қадағалаңыз