Көкшетаудағы мұз аренасы неге екі жарым жыл бойы бос тұр

Сарыарқа шағынауданының тұрғындары мен хоккей жанкүйерлері көлемі 26×56 метр болатын хоккей корты бар мұз аренасы есігі қайта айқара ашылады деп үміттенеді. Алайда қазір нысан бос тұр, оның аумағына кіруге шектеу қойылған.

Осы күнге дейін нысан тағдырына қатысты іс сотта бірнеше рет қаралды. Мәселе жер дауынан басталған. Биыл мамырда Ақмола облысының мамандандырылған ауданаралық экономикалық соты дауға нүкте қойды. Талапкер - Ақмола облысының жер ресурстарын басқару департаменті, жауапкерлер - аренаны салған «Qazaq Union» ЖШС, «KOKSHE» ӘКК» АҚ және Көкшетау қаласының жер қатынастары, сәулет және қала құрылысы бөлімі.

Мәселенің мәні

2021 жылғы маусымда «KOKSHE» ӘКК» АҚ-қа Көкшетау әкімдігінің қаулысына сәйкес, жабық мұз аренасын салу жөніндегі бірлескен инвестициялық жобаны іске асыру үшін 4 гектар жер учаскесін жеті жыл мерзімге уақытша жер пайдалану құқығымен (жалдау құқығын сатып алу шартымен) беру туралы шешім қабылданған.

Бірнеше күннен кейін қаладағы жер қатынастары бөлімі мен «KOKSHE» ӘКК» АҚ арасында жерді жалға алу және уақытша жер пайдалану құқығын сату туралы келісімшарт жасалды. Кейін 2021 жылғы 21 маусымда, «KOKSHE» ӘКК» АҚ «Qazaq Union» ЖШС-мен «Хоккейге арналған жабық мұз аренасын қосалқы үй-жаймен бірге салу» атты әлеуметтік жобаны жүзеге асыру жөнінде бірлескен қызмет туралы шартқа қол қойды.

Ал 2023 жылғы мамырда Көкшетау әкімдігі «Qazaq Union» ЖШС-не аталған жер учаскесіне жеке меншік құқығын беріп, тараптар жерді сату-сатып алу келісімін жасады.

Жер ресурстарын басқару департаменті жоғарыда аталған мәмілелер заң талаптарына сай келмейді деп есептеп, сотқа жүгінді. Талапкердің дерегінше, жер учаскесі берілген кезде мұз аренасын салу жоспарланған ауданның егжей-тегжейлі жоспарлау жобасы әзірленіп, бекітілмеген. Осы негізде департамент жер қатынастары бөлімі, «KOKSHE» ӘКК» АҚ және «Qazaq Union» ЖШС арасында жасалған үш шартты жарамсыз деп тануды сұрады.

Сот анықтағандай, жер учаскесі берілген сәтте егжей-тегжейлі жоспарлау жобасы расында болмаған. Ол Көкшетау қаласы әкімдігінің қаулысымен тек 2021 жылдың қыркүйегінде, яғни даулы шарттар жасалғаннан кейін бекітілген.

Сонымен қатар сот Жер кодексі мен «Сәулет, қала құрылысы және құрылыс қызметі туралы» заңның нормаларына сүйеніп, мемлекеттік меншікке жататын жер учаскелерін беру тек конкурс (аукцион) арқылы жүзеге асырылуы тиіс екенін атап өтті, егер заңда өзгеше көзделмесе.

Сондай-ақ сот «KOKSHE» ӘКК» мен «Qazaq Union» арасындағы ұқсас дауға байланысты бұрын заңды күшіне енген шешімді де ескерді. Ол шешім бойынша бір шарт жарамсыз деп танылған, себебі жер учаскесін беру конкурстық рәсімсіз өткен.

Нәтижесінде сот отырысы қорытындысы бойынша Көкшетау қаласының жер қатынастары, сәулет және қала құрылысы бөлімі, «KOKSHE» ӘКК» АҚ және «Qazaq Union» ЖШС арасында жасалған үш шартты жарамсыз деп таныды.

Шенеуніктер не дейді

Көкшетау қаласы әкімдігінің хабарлауынша, «KOKSHE» ӘКК» АҚ да бірлескен жобаның қатысушысы ретінде Ақмола облысының мамандандырылған ауданаралық экономикалық сотына аталған жер учаскесінің сату-сатып алу шартын жарамсыз деп тану туралы талап арыз берген.

- 2024 жылғы 3 қыркүйектегі сот шешімімен талап қанағаттандырылды. 2023 жылғы 26 мамырда Көкшетау қаласының жер қатынастары, сәулет және қала құрылысы бөлімі мен «Qazaq Union» ЖШС арасында жасалған №95 жер учаскесін сату-сатып алу шарты жарамсыз деп танылды. Сот жер учаскесін жеке меншікке беру заң талаптарына және бірлескен қызмет шартының талаптарына сәйкес келмегенін анықтады, - деп мәлімдеді ведомство.

Алайда мұз аренасы 2023 жылғы 11 сәуірде пайдалануға берілген, аталған факт қабылдау актісімен расталған. Осыған байланысты нысан иесі Қазақстан Республикасының Жер кодексінің 52-бабында көзделген құқықты пайдаланып, ғимаратқа меншік құқығы сол нысан орналасқан жер учаскесіне құқық беретінін негізге алған.

- Қазір құжаттарды қолданыстағы заңнамаға сәйкестендіру жұмыстары жүргізіліп жатыр. Барлық рәсім аяқталғаннан кейін нысанды мақсатты пайдалану тәртібі айқындалады, - деп түсіндірді Көкшетау әкімдігінен.

Айта кетсек, Петропавлда халықаралық талаптарға сай мұз аренасы салынып жатыр.