Көлік апатын азайтатын дрондар

Абай облысында дрондар өрісте бағусыз жайылған малдың жол-көлік оқиғаларына себеп болу фактісін азайтуға көмек­те­сіп жатыр.

Бүгінде елді мекен төңіре­гін­дегі жолдардағы негізгі мәселелердің бірі малдың көлік жолына жақын маңда жайылып, әрі-бері өтуінде болып отыр. Әсіресе түнде өз аяғымен жайы­латын өрістегі ірі-қара жол-көлік шырғалаңына жиі себеп болып, жүргізушілер мен жолаушылардың өміріне қауіп төндіреді.

Абай облысында бұл мәселені шешу үшін заманауи технологиялар енгізіле бастады. Аудан әкімдіктерінің қолдауымен жер­гілікті полиция бөлімшелері патрульдік қызметі аумақты тұрақ­ты бақылауға, автожол маңында еркін жайылып жүрген малды жедел анықтауға мүмкіндік беретін дрондармен жабдықталды. Жоғары сапалы камерасы бар ұшқынсыз алғыр аппараттар малдың жүрген жерін анықтап, нақты уақыт режімінде көрсетіп, тез әрекет етуге жағдай жасайды.

Мәселен, Жаңасемей ауданында жүргізілген бақылау жұмысы барысында 59 бас жылқы анықталып, жол жиегінен алыстатылған. Маман­дардың айтуынша, қараусыз жүр­ген мал  Семей – Өскемен және Омбы – Майқапшағай бағыттарындағы қозғалысы көп жолдарда жиі кезде­сетіні байқалды. Дрондарды қолдану бұл қауіп-қатерді айтар­лықтай төмендетіп, өңірдегі жол қауіпсіздігі деңгейін жақсартуға мүмкіндік бермек.

Статистика да бұл жұмыстың тиім­ділігін растап отыр. Мәселен, жыл басы­нан бері полиция қызметкерлері малдың қараусыз жайылуына қатысты 2 284 құқық бұзушылықты анықтаған. Арнайы айып тұрақтарына 9 729 бас мал жеткізіліп, олардың иелері «Әкім­шілік құқық бұзушылық туралы» кодекстің 408-бабымен жауап­кер­ші­лік­ке тартылған.

Әрине, бұл да – оңай шаруа емес. Аяқты мақұлық қауіп-қатер дегенді қайдан ұқсын, от қуалап жайыла береді. Ол үшін мал иесі айыппұл арқалауы да – дау тудырмай тұрмайтын жайт. Осы ретте жаңа технологияның мүмкіндігін тиімді пайдаға асыру қай тарапқа да құба-құп іс болып отыр.

«Сонымен қатар ауыл ша­руа­шы­лығы жануарларын сәй­кес­­тендіру талаптарының бұзы­луына қатысты 201 дерек тір­келіп, материалдар ветери­­нар­лық инспекцияға жолданды. Заманауи технологиялар­ды про­фи­лактикалық іс-қимылдар­мен ұштастыру полицияға оқыс оқи­ғалардың алдын алуға ғана емес, мал иелерінің жауапкершілік мәдениетін арттыруға да мүмкіндік береді. Осындай кешенді тәсіл Абай облысының жолдарын анағұрлым қауіпсіз етуге өз үлесін қосып жатыр», дейді облыстық полиция департаментінің баспасөз қызметі.

Абай облысы