Көлік қозғалтқышын сөндірмейтіндер жазаланады

Кейбір Еуропа елдерінде көлікті ұзақ уақыт қосып қоятындарға жаза қарастырылған. Бұл әрекет қоршаған ортаны ластау болып саналады. Бес минут, 10 минут деген талап жоқ, машина қозғалмай, үзіліссіз жұмыс істеп тұрса болды, Бельгия және Франция жүргізушілері біздің ақшаға шаққанда шамамен 70 000 теңге, Ұлыбританияда 48 000 теңгедей айыппұл төлейді. 

Алайда ескеретін жайт, Ұлыбританияның климаты қатал емес. Темір тұлпарды жылытуға көп уақыт кетпейді. Дегенмен қоғамдық орындарда көлігін сөндірмей тұратындар баршылық. Ондайлар міндетті түрде айыппұл төлейді. Егер ақша белгіленген мерзімінде аударылмаса, айыппұл көлемі екі есеге дейін өседі. Лондон сияқты ірі қалаларда оның көлемі тіпті жоғары.

Дэвид Смит, қоғам белсендісі: 

- Аудан әкімшілігінің жауапты адамы алдымен жүргізушіні сырттай бақылап тұрады. Кейін жанына барып, «кешіріңіз, қозғалтқышыңызды сөндіре аласыз ба?», - деп сұрайды. Талабы орындалмаса, айыппұл түбіртегі жазылады. Жүріп бара жатқан көлікпен салыстырғанда қозғалтқышы өшпей, тоқтап тұрған машинаның адам денсаулығына тигізер залалы екі есе.