Медицина қызметкерлеріне күш көрсеткендер қатаң жазаланады

Медицина қызметкерлеріне күш көрсететіндер енді қатаң жазаланады.

Оған сәйкес Қылмыстық кодекске жаңа бап енгізіледі. Яғни бұдан былай жазықтылар 12 жылға дейін бас бостандығынан айырылуы мүмкін. Тиісті Заңға Президент қол қойды.

Бұл әлеуметтік желі әшкере еткен әлімжеттік кадрлары. Соңғы бес жылда елде медицина қызметкерлеріне дәл осындай 300-ге тарта озбырлық жасалған. Оның 70-і биыл болған. 

Ильянур Әжғалиева, ҚР ДСМ Ғылым және адам ресурстары департаменті басқармасының басшысы:

- Егер қарасақ, жылына шамамен 10–12 жағдай тұрақты түрде тіркеледі. Алайда соңғы жылды, нақты айтқанда өткен жылды алатын болсақ, онда шамамен 20 жағдай анықталды. Яғни науқастардың тарапынан біздің медицина қызметкерлеріне күш көрсету деректері жыл санап жиілеп бара жатқаны алаңдатып отыр. 

Осы себепті елде дәрменсіз дәрігерлерді қорғау күшейтілді. Президент тиісті заңға қол қойды. Демек, жазықтылар енді қатаң жазаланады. Яғни жұдырық ала жүгіргендерді 12 жылға дейін бас бостандығынан айыру қарастырылып отыр. 

Бағжан Мұхаметбек, ҚР ДСМ Ғылым және адам ресурстары департаменті директорының орынбасары:

- Осы жағдайларды ескере отырып, Қылмыстық кодексте медицина қызметкерлеріне қорқыту жүргізілетін болса, немесе жедел жәодем жүргізушісіне қандай да бір күш қолданылса, бұл жағдайда қылмыстық жаза күшейтілді. Яғни 200 АЕК-тен 12 жылға дейін  бас бостандығынан айыру көзделеді.

Жедел жәрдем көлігі кезекті шақыртуға асығып барады. Олар үшін әр минут қымбат. Науқастың жанын аман алып қалуға асыққан ақ халаттылар кейде өз басын қатерге тігеді. Енді олардың қауіпсіздігі мен сапалы медициналық көмек көрсетуі үшін видеожетондар беріліп жатыр.

Гауһар Шәдібек, қалалық жедел медициналық жәрдем станциясының қызметкері:

- Науқастармен келеңсіз жағдай болған кезде, түсініспеушілік болған кезде осы жетонды пайдаланып, сол арқылы біз өзіміздің қауіпсіздігімізді сақтаймыз. 

Жауапкершілік тек тікелей шабуыл жасағанға ғана емес, қорқытып, үркіткендерге де қатысты. Жаңа норма аясында құқық бұзу түріне қарай айыппұл салу, қоғамдық жұмысқа тарту немесе бас бостандығынан айыру сынды жаза түрлері енгізілген. Жалпы мұндай тәжірибе АҚШ, Ұлыбритания сынды әлемнің бірқатар елінде кеңінен қолданылады. Енді бұл бастама біздің елде сала мамандарына жиілеп кеткен агрессияға заң жүзінде тосқауыл қояды деген үміт бар. 

Назерке Тоқжан