Көлік салонынан лақтырылған сіріңке жүргізушіні 1,6 миллион теңгеден айырды

Астанадағы тұрақтардың бірінде көлік терезесінен лақтырылған сөнбеген сіріңке мен көрші автокөліктің ақауы өртке себеп болды, деп хабарлайды Tengri Auto.

Талап арыз жауапкердің тұрғылықты жері бойынша берілгендіктен, істі Тараз қалалық соты қарады.

Оқиға 2025 жылдың мамыр айында елордадағы тұрақтардың бірінде болған. Іс материалдарына сәйкес, ер адам көлік ішінде отырып темекі тұтатып, сөнбеген сіріңкені терезеден лақтырып жіберген. Көп ұзамай жанында тұрған газ жабдығы орнатылған Audi A6 көлігі өртенген.

Тәуелсіз бағалаушының қорытындысы бойынша, шығын көлемі 2,9 миллион теңгеден асқан. Өрттің басталу сәті сыртқы бақылау камераларына түсіп қалған.

Сараптама өрттің Audi көлігінен газ жылыстауы салдарынан түзілген газ-ауа қоспасының тұтануынан болғанын көрсетті. Тұтану көзі жауапкер лақтырған сіріңке болған.

Бұл ретте ер адамға қатысты қылмыстық іс қасақана ниеттің болмауына байланысты тоқтатылса, әкімшілік іс мерзімінің өтуіне байланысты жабылды. Алайда сот бұл жағдай оны келтірілген шығынды өтеу міндетінен босатпайтынын атап өтті.

Сонымен қатар сот өртенген көлік иесінің де өрескел абайсыздыққа жол бергенін анықтады. Газ жабдығы бар көлікті ұзақ уақытқа тұраққа қояр алдында өрт қауіпсіздігінің міндетті талаптары сақталмаған, бұл газдың жылыстауына әкеп соққан.

Нәтижесінде сот өрттің екі фактордың: сөнбеген сіріңкенің лақтырылуы мен газ жабдығы бар көлікті пайдалану ережелерінің бұзылуының жиынтығынан болған деген қорытындыға келді.

Әр тараптың кінәсінің деңгейін ескере отырып, талап арыз ішінара қанағаттандырылды. Жауапкерден материалдық шығын мен сот шығындарын өтеу ретінде 1,6 миллион теңгеден астам қаражат өндірілді.

Google News арқылы жаңалықтарымызды қадағалаңыз