Көп нәрсені дұрыс жасамаппын... : Жазира Байырбекова өмірден түйген ойын айтты

Әнші Жазира Байырбекова өмірлік ұстанымы туралы сөз қозғады, – деп жазды Aikyn.kz.

Өнер иесі әлеуметтік желідегі парақшасында бар уақытын отбасына арнағанын, қазіргі жастардың көзқарасымен қарағанда, «тым ыңғайлы әйел» болғанын атап өтті. Өйткені отбасында өзін емес, күйеуін бірінші орынға қойған.

«Мен көп нәрсені дұрыс жасамаппын. Қазіргі жастардың іс-әрекеттеріне қарасам, мен тым ыңғайлы әйел екенмін. Күйеуімнен ешқашан материалдық ештеңе сұрамаппын. Қыздармен қыдырып, күйеуімсіз достармен бас қосып, көңіл көтермеппін. Жұмысыма, отбасыма арнадым уақытымның бәрін. Мынау әйелдің міндеті, мынау еркектің міндеті демей, ауырды да, жеңілді де бірге көтеріппін. Өзімді бірінші орынға қоймай, күйеуімді бірінші орынға қойып, әр шешім қабылдарда күйеуімнің көзімен қарап, күйеуімнің қалауын ескеріппін. Әр нәрседе соңғы шешімді күйеуім шешкенін күтіппін. Маған қаталдық көрсетіп, ренжіткендерді де құрметтеп, сыйлап, кешіріп, түсінуге тырысыппын. Ойлана келе, қазіргі жеткен жетістіктерімнің барлығы осы күнге дейін бәрін дұрыс жасамағанымның нәтижесі сияқты. Бәрін дұрыс жасаймын деп өмірлерін құртып алып жатқан жас отбасылар қаншама. Кейде кей нәрселерді дұрыс жасамаған да пайдалы. Аллаға шүкір», — дейді әнші.

Желі қолданушылары әншінің астарлы жазбасына бейжай қарамай, қолдау білдірді.

«Бәрін дұрыс жасаймын деп өмірлерін құртып алып жатқандар қаншама!» Әсерлі әрі терең сөз», «Ақылды жеңешем-ай», «Сізде түпкі ниетіңіз – бақытты болудың жолын жасадыңыз, өз бетінше. Сол сияқты кез келген адам миының барлық ресурсын қосады өмірлік ситуацияда», «Осындай ой неге 40 жастан кейін келеді екен», «Демек, бәрін дұрыс жасадыңыз», - деп жазды оқырмандар.

Сараптама, зерттеу мақала, күнделікті өзекті ақпаратты «Айқынның»  TELEGRAM арнасынан табасыз.