Корея жасанды интеллектті дамытуға 6,7 млрд АҚШ долларын жұмсайды

Биыл Оңтүстік Кореяда жасанды интеллектіні дамытуға шамамен 6 миллиард 700 миллион АҚШ долларын жұмсау жоспарланып отыр.

Таяуда күшіне енген заң да саланы қолдауға септігін тигізбек. Осылайша Сеул жасанды интеллектіні дамыту бойынша әлемдік үздік үшткке енуді жоспарлап отыр. 

Владислав Цой, тілші: 

- Оңтүстік Корея 2030 жылға қарай  АҚШ және Қытаймен бірге жасанды интеллект саласында әлемдік көшбасшылардың үштігіне енуді көздеп отыр. Осы мақсатқа жету үшін ел үкіметі тиісті заң қабылдап, саланы қолдауды күшейтті. Биылдың өзінде жасанды интеллектіні дамытуға шамамен 6 миллиард 700 миллион АҚШ доллары бөлінеді. Бұл 2024 жылмен салыстырғанда үш есе көп.

Жасанды интеллект саласын қолдау шаралары мен оның қауіпсіздігін қамтамасыз ету тетіктері жаңа заңда нақты көрсетілген. Үкімет келесі жылға дейін осы индустрияға шамамен 6 миллиард 400 миллион АҚШ долларын инвестициялауды жоспарлап отыр. Сондай-ақ 2030 жылға қарай ұлттық компаниялар мен стартаптарға 200 мың сала маманын тартып, 260 мың графикалық процессор бөлуді қалайды. 

Ким Гук Хён, Корея ғылым және ақпараттық коммуникация технологиясы министрлігінің бөлім басшысы:

- Бұл заңда инновация мен қауіпсіздік бірдей деңгейде қарастырылған. Мемлекет базалық стандарттарды реттеуді барынша азайта отырып белгілейді. Бірақ қауіп төндіру мүмкіндігі жоғары деген жасанды интеллект технологияларын пайдалануда тәуекелдерді басқару жүйесін компаниялар өздері әзірлейтін болады. 

 Жасанды интеллект мүмкіндіктерін ағылшын тілі пәнінің оқытушысы Андрей Нам да пайдалануды жөн көрген. Орал қаласының тумасы ақылды зердені валюта бағамын болжау үшін қолданған. Оған стартап ашу идеясы жасанды интеллект мектебін тәмамдағаннан кейін келген. Кәсіпкер бизнесін АҚШ-та дамытуды жоспарлап отыр. Жерлесіміз Қазақстанда жасанды интеллектке ерекше көңіл бөлініп жатқандықтан елге оралуы да мүмкін екенін айтады.

Андрей Нам, стартап негізін қалаушы:

- Әрине елге қайтқым келеді. Қазақстанда да жасанды интеллект туралы заң қабылданды ғой. Қазір үкімет бизнеске: «Осы бағытта жұмыс істеңдер, біз сіздерге қаржы бөлуге дайынбыз, бірақ белгілі бір ережелерді сақтаңдар», – деп айтып жатыр. Қазіргі басты бағыт - мемлекеттік қызметтер. 

Корея билігі биыл 6G технологияларына инвестиция салуды жоспарлап отыр. Ал алдағы үш жылда жасанды интеллектіні барлық салаға енгізуді көздейді: Оның ішінде өнеркәсіпте – 70 пайыз, ал мемлекеттік секторда 95 пайызға дейін жеткізілмек. Сала қарқынды дамып жатқандықтан заңға үнемі өзгерістер енгізіп отыру қарастырылған. 

Владислав Цой, Ольга Лян