​Кремль: Орбан ЕО да Ресейдің одақтасы болған жоқ

Ресей президентінің баспасөз хатшысы Дмитрий Песковтың айтуынша, Венгрия премьер-министрі Виктор Орбан Еуропалық одақта Ресейдің одақтасы ретінде әрекет етпеген, ол өз елінің мүддесіне сүйене отырып саясат жүргізген, деп хабарлайды АА.

India Today телеарнасына берген сұхбатында Песков Орбанның жылдар бойы Венгрияның ішкі мүдделерін бірінші орынға қойғанын атап өтті. 

Оның сөзінше, оны Мәскеудің одақтасы ретінде қарастыру дұрыс емес. Сонымен қатар, Ресей мен Венгрия арасында Орбан билікте болған кезеңде де келіспеушіліктер болғанын айтты.

Песков Мәскеуде «ФИДЕС» партиясының ықтимал жеңілісін Ресей үшін жоғалту деп бағаламайтынын да жеткізді.

12 сәуірде Венгрияда парламенттік сайлау өтті. Ұлттық сайлау комиссиясының алдын ала деректеріне сәйкес, бюллетеньдердің 98,9%-ы өңделгеннен кейін оппозициялық «Тиса» партиясы 199 орынның 136-сын алып, конституциялық көпшілікке қол жеткізді. Орбанның «ФИДЕС» партиясы 57 мандатпен екінші орынға шықты.

Сайлаудың түпкілікті нәтижелері, соның ішінде шетелдегі дауыс беру қорытындылары апта соңына дейін жариялануы күтілуде. Жеңіске жеткен «Тиса» партиясының жетекшісі Петер Мадьяр жақын күндері жаңа үкіметті құруға кіріседі.

Бүгін, 12:21