​Күйеуінің қорлығынан ауруханаға түскен жүкті әйел күйеуін жазалауды талап етеді

Атырау облысы Индер ауданында төртінші перзентіне аяғы ауыр, 32 жастағы үш баланың анасы Ақбөбек Оразбаева күйеуінің аяусыз соққысынан кейін ауруханаға түсті, деп хабарлайды КТК.

Жәбірленушінің айтуынша, күйеуі бұған дейін де жүйелі түрде қол жұмсап келген. Алайда бұл жолы оның әрекеті тым шектен шығып, мас күйінде үйге келіп, ұйықтап жатқан әйелін басынан періп жіберген. Ауыр соққыдан басы мен құлағы шыңылдап кеткен әйел балаларының көзінше таяқ жегенін еске алады. Осы сәтте ояу жатқан кіші қызы мен өзге де балалары қорыққанынан өздерін ұйықтаған сияқты ұстауға мәжбүр болған.

Өміріне төнген қауіпті түсінген Ақбөбек жан сауғалап, көршісінің үйіне қашып барып, сол жерден жедел жәрдем шақырған. Индер аудандық ауруханасының хирургі Асланбек Ермұхановтың мәлімдеуінше, науқастың басы, жағы көгеріп, миы шайқалған, сондай-ақ сол жақ аяғында қанталаған іздер бар. Іштің ауырсынуына байланысты ол бірден гинекологтың бақылауына алынып, хирургия бөліміне емдеуге жатқызылды.

Жәбірленуші мен оның туыстары құзырлы органдардың бұл қылмысқа бейқам қарағанына қатты ашынуда. Ақбөбектің айтуынша, ауруханаға келген полиция қызметкері оны қорғаудың орнына, «отбасыңды сақта, ертең ұрысып, қайта табысасыңдар» деп басу айтумен шектелген. Сонымен қатар тәртіп сақшылары күдіктіні бірден ұстауға асықпаған: оқиға түнде болғанына қарамастан, ол келесі күні түске дейін өз үйінде ұйықтап жатқан.

Тек жәбірленушінің Атыраудан келген әпкесі Ақтоты Оразбаеваның табанды талабы мен шуынан кейін ғана полиция күдіктіні ұстап, 24 сағатқа қамауға алған. Алайда уақытша қамаудан босап шыққан күйеуі бірден ауруханаға барып, емделіп жатқан әйеліне тағы да мінез көрсетіп, доқ жасаған. Жауапты мекемелер мен аудандық прокуратура бұл жағдайға байланысты бірден түсініктеме бере қоймағанымен, кейіннен полиция күдіктіні тергеу изоляторына қайта қамағаны туралы хабарлады. Жәбірленуші тарап екі адамның өміріне қауіп төндірген азаматтың заң алдында тиісті жазасын алуын талап етіп отыр.

Кеше, 12:27