Күштік құрылымдар арасында Cyber Challenge Kazakhstan жарысы басталды

Астанада күштік құрылымдар арасында «Cyber Challenge Kazakhstan» жарысы бастау алды. 

Мемлекеттік күзет қызметінің бастамасымен өтіп жатқан турнир елде алғаш рет ұйымдастырылып отыр. Шара мақсаты - кибер қауіпсіздік саласындағы әскери мамандардың білім-біліктілігін арттыру. Жарысқа қатысушылар ақпараттық жүйелерді бұзу, радиосигналдарды бұғаттау, ақпараттық базаны бұзып, маңызды инфрақұрылымдарға хакерлік шабуыл жасау сияқты тапсырмаларды орындайды. Ол үшін ұйымдастырушылар арнайы виртуалды полигон жасаған. Сынға түсушілер нысанның қорғаныс жүйесін бұзып, оны жарықсыз немесе жылусыз қалдыру сынды міндеттерді орындайды. Жарыста Ұлттық қауіпсіздік комитеті, Қорғаныс министрлігі, Ішкі істер министрлігі, Ұлттық ұлан, және Мемлекеттік техникалық қызмет өкілдерінен құралған 10 команда бақ сынайды.   

Диаз Рақымжанов, турнир ұйымдастырушысы:

- Бұл қалада банк, әкімдік, өндірістік инфрақұрылымдар барлығы бар. Енді осы нысандардың ақпараттық жүйелерін турнирге қатысушылар бұзулары қажет. Яғни бірдеңені қорғау үшін оны бұза білуі керек. Киберқылмыскерлер қалай әрекет ететінін түсіну қажет.