Мадуроның әйелі денсаулығына байланысты өзін үйқамаққа жіберуді сұрады

Венесуэланың бұрынғы президенті Николас Мадуроның жұбайы Силия Флорес ауыр дертіне байланысты федералды судьядан өзін сотқа дейін қамаудан босатуды сұрады, деп хабарлайды Tengrinews.kz тілшісі NBC News сайтына сілтеме жасап.

Оның адвокаты Марк Доннелли өз өтінішінде Флореске сотты үйқамақта күтуге мүмкіндік беру керектігін айтты. Бұл оған ұсынылған жүрек катетеризациясынан кейін оңалуға жағдай жасайды, себебі бұл процедурадан кейін неғұрлым инвазивті кардиологиялық оталар қажет болуы мүмкін.

"АҚШ-тың Венесуэлаға әскери басып кіруіне дейін Флорес де Мадуро ханымның денсаулығы жақсы болған және митральды клапан пролапсын бақылау үшін ай сайын салынатын екпеден бөлек ешқандай дәрі-дәрмекті тұрақты түрде қабылдамаған", – деді Доннелли.

Оның айтуынша, қазір әйелге бірнеше препарат, соның ішінде жүрек талмасы болған жағдайда қабылдау қажет дәрі тағайындалған. Сонымен қатар ол медициналық тексеруден өтуді жалғастырып жатыр және дәрігерлердің қосымша тестілеу мен хирургиялық араласу қажеттілігі туралы ұсыныстарын қарастырып жатыр.

Сондай-ақ Доннелли Флорес қамауға алынғаннан бері митральды клапан пролапсын емдеуге арналған ай сайынғы екпесін алмағанын хабарлады.

69 жастағы Флорес пен 63 жастағы Мадуро АҚШ әскерилері Каракастағы үйінде түнгі рейд кезінде ұстап, Нью-Йоркке жеткізгеннен бері Бруклиндегі түрмеде отыр. Қаңтар айында ерлі-зайыптыға кокаин тасымалдау мақсатында сөз байласты, сондай-ақ пулеметтер мен жарылғыш құрылғыларды сақтады деген айып тағылды. Сонымен қатар Мадуро есірткі терроризміне қатысты сөз байласты деп айыпталып отыр.

Мадуро мен Флорес тағылған айыптардың ешқайсысын мойындаған жоқ. Олардың үстінен сот процесі маусым айында басталуы тиіс. Кінәлі деп танылған жағдайда олар өмір бойына бас бостандығынан айырылуы мүмкін.

Өткен аптада ерлі-зайыптылар федералды судьядан есірткінің заңсыз айналымы туралы айыптарды алып тастауды сұрады, олар шет мемлекеттің басшысы және бірінші ханымы ретінде қылмыстық қудалаудан иммунитетке ие екенін алға тартты.

“Ұстанымымыз берік“: Николас Мадуро Америка түрмесінен немерелеріне суреттер жіберді

Бізді Google-дың негізгі дереккөздер тізіміне қосыңыз