​Мәжіліс депутаты Жайық пен Қиғаш өзендерінің сағасындағы экологиялық жағдайға алаңдаушылық білдірді

«AMANAT» партиясы фракциясынан Мәжіліс депутаты Дүйсенбай Тұрғанов Премьер-министр Олжас Бектеновке депутаттық сауал жолдап, Жайық пен Қиғаш өзендері сағасының деградацияға ұшырауына қатысты мәселе көтерді.

Парламент өкілі өз үндеуінде өзен сағаларының таяздануы, лайлануы және су ресурстарының азаюы жүйелі сипат алып жатқанын атап өтті. Бұл жағдай Каспий бассейнінің экожүйесіне, балық қорына және жағалаудағы аудандардың әлеуметтік-экономикалық жағдайына кері әсерін тигізіп жатыр.

Депутаттың айтуынша, сағалық аймақтардың тозуы балық уылдырық шашатын орындардың жойылуына, биоалуантүрліліктің төмендеуіне және балық шаруашылығымен айналысатын жергілікті халықтың өмір сүру сапасының нашарлауына әкеп соқтыруда. Сонымен қатар, ол мемлекеттік органдар арасындағы үйлестіру жұмыстарының нашарлығына және су экожүйелерін қалпына келтіруде кешенді тәсілдің жоқтығына ерекше назар аударды.

Дүйсенбай Тұрғанов Үкіметті Жайық пен Қиғаш өзендерінің сағасын сақтау және қалпына келтіру бойынша жүйелі шаралар әзірлеуге, ведомствоаралық іс-қимылды күшейтуге, сондай-ақ ғылыми зерттеулер мен практикалық табиғат қорғау іс-шараларын қаржыландыруды қарастыруға шақырды.

Су нысандарының одан әрі тозуын болдырмау және экологиялық келеңсіздіктерді азайту мақсатында, Премьер-министрге бұл мәселені экологтарды, ғалымдарды және өңір өкілдерін тарта отырып, уәкілетті мемлекеттік органдар деңгейінде қарау ұсынылды.

Бүгін, 16:34