Моңғолия президенті Қазақстанға сапармен келеді Тоқаев

АСТАНА, 16 сәуір – Sputnik. Қазақстанға Моңғолия президенті сапармен келеді. Бұл туралы Қасым-Жомарт Тоқаев жаңадан тағайындалған елшілермен өткен кездесуде айтты, деп хабарлайды Sputnik Қазақстан тілшісі.

Президент Қазақстанның барлық елдермен конструктивті әрі өзара тиімді қарым-қатынас орнатуға бағытталған бейбіт және теңгерімді сыртқы саясат жүргізе беретінін ерекше атап өтті.

"Қазақстанда елдеріңіздің мүддесіне сай келетін мүмкіндік мол екеніне сенімдімін. Келесі аптаның жұмыс кестесі өте тығыз болмақ. Моңғолия Президенті сапармен келеді. Астанада БҰҰ аясында Өңірлік экологиялық саммит ұйымдастырылады. Сондай-ақ Халықаралық Аралды құтқару қорына мүше мемлекеттер басшылары кеңесінің отырысын өткіземіз", - деді Тоқаев.

Осы орайда президент дипломаттардың Қазақстандағы оқиғаларды мұқият саралап, өзара ынтымақтастықты нығайтуға айрықша үлес қосатынына да сенім білдірді. Сондай-ақ, елшілерге ауқымды контституциялық реформалардың мән-маңызын айтып берді.

"Біздің мақсатымыз – ашық нарықтық экономиканы дамыту. Шетелден инвестиция келуіне мүдделіміз. Қазақстан басты халықаралық қаржы институттарымен және ұйымдармен тығыз байланыс орнатқан", – деді мемлекет басшысы.