Н. Аралбайұлы: қаржыны тиімді қолдану қажет

Павлодар қаласында мәнерлеп сырғанаудан ел біріншілігі аяқталды. Ерлер арасында Шымкенттік Олег Мельников Қазақстан чемпионы атанса, Диас Жиренбаев күміс, Никита Кривошеев қоланы қанағат тұтты. Қыздар арасында Алматылық Амира Ирматова топ жарды. 

ҚХЛ: «Барыс» «Динамоны» жеңді 

«Барыс» жеңіске жетті. Астаналық команда құрлықтық хоккей лигасы аясындағы кезекті кзедесуін Мәскеуде өткізіп, жергілікті «Динамодан» басым түсті.

Қорытынды есеп: 4:2. Қазақстандық клуб сапынан Аңсар Шайхмедденов, Семен Семенов, Иэн Маккошен және Дінмұхамед Қайыржан шайба соқты. Бұл жеңіске қақпашы Андрей Шутовдың да қосқан үлесі зор. Өйткені, ол 30-дан аса сейв жасады. Соның арқасында жалпы статистикадағы жағдайын жақсартты. Айта кету керек, «Барыс» осымен төртінші кездесу қатарынан ұпай еншілеп келеді. Нәтижесінде турнирлік тізімде, яғни Шығыс Конференцисының тізімінде 8-сатыға көтерілді. Михаил Кравец баптайтын жігіттер енді бірер күннен кейін елге оралып, өз алаңында ойындар өткізе бастайды. Мәселен, 21-ші желтоқсанда Астанада «Барыс» және «Сочи» командалары жолығады

Бұрымды боксшылар дайындыққа кірісті  

Бұрымды боксшылар физикалық дайындықты пысқытап жатыр. Жалпы ұлттық құрама өкілдерінің жаттығулар және жарыстар кестесі өте тығыз. Бұл жөнінде бас бапкер Елдос Сайдалин мәлімдеді. 

Ел намысын қорғайтын қыздар қазір Түркістан облысында 21 күн бойы дене дайындығына және күшті арттыруға қажетті әзірлік өткізеді. Одан кейін қаңтарда Алматы облысында кешенді жаттығу жиынын жасау жоспарланып отыр. Ары қарай қазақ қыздары Кәрі Құрлықтағы бірнеше турнирге қатысады. Ал ең негізгі жарыс – күзде Жапонияның Нагоя қаласында өтетін азия ойындары болмақ. Сәйкесінше, 2026 жыл бойы жасалатын жаттығулар мен қатысатын бәсекелер жоғарыдағы кешенді жарысқа дайындық есебінде жүреді. Жалпы 2025 жыл боксшы қыздар үшін өте сәтті болды. Қос бірдей әлем чемпионатында жақсы нәтиже тіркеп, жалпы командалық есепте топ басына шыққан болатын. «Енді алдағы жылы осы қарқынды жоғалтпай, жеңіс жолын жалғауға тырысамыз», - деді бас бапкер.  

Н. Аралбайұлы: қаржыны тиімді қолдану қажет  

Футбол клубтары халықтың қазынасына қол сала бермей, өздері ақша тауып үйрену керек. Бұл жөнінде Мәжіліс депутаты Нартай Аралбайұлы мәлімдеді. Оның айтуынша, биылдың өзінде осы мақсатта бюджетен 31,7 миллиард теңге бөлінді. Ал ең қымбат команда саналатын «Астана» квазимемлекеттік сектордан, яғни тағы да халықтың қаржысынан 5,3 миллиард теңге алды. Өкініштісі, аталмыш командалар өздігінен инвестор тартуға, қосымша табыс табуға және шетелдік клубтар сияқты дамудың жаңа деңгейіне шығуға құлықсыз. Сондықтан Президент арнайы тапсырма беріп, қазір жекешелендіру жұмыстары қарқынды жүріп жатыр. «Ал футбол клубтарынан үнемделген қаржы алдағы уақытта әлеуметтік мәселелерді шешуге және мұқтаж жандарды қолдауға жұмсалуы қажет», - дейді депутат.