Навигациялық пломбаларды енгізуге байланысты тасымал қымбаттамайды ЕЭК

АСТАНА, 21 қазан – Sputnik. Еуразиялық экономикалық комиссия 2026 жылы ЕАЭО аясында навигациялық пломбаларды енгізуге байланысты тасымал құны қымбаттайды деген алаңдаушылыққа негіз жоқ екенін мәлімдеді.

Қазақстан бизнесі пломбаларды енгізуді 2026 жылдың соңына дейін кейінге қалдыруды ұсынды. Олардың айтуынша, бұл жүк тасымалдау бағасын 20–30%-ға дейін арттыруы мүмкін.

Қазақстанда бір пломбаның бағасы шамамен 300 АҚШ долларын құрайды. Беларусьте ол шамамен 150 долларға бағаланып отыр.

"Белтаможсервис" компаниясының бас директоры Дмитрий Коваленконың айтуынша, 22 тонналық бір контейнер үшін бұл килограмына шаққанда 0,01 доллардан аспайды.

"Шекарада жүргізушілердің тұрып қалуы мен іссапар шығыны пломба бағасымен пара-пар", – деді ол.

ЕЭК-тің кедендік ынтымақтастық министрі Руслан Давыдовтың айтуынша, тасымал құнына әсер ететін факторлар пломбалармен шектелмейді.

"Мысалы, Суэц каналында кеме кесе көлденең тұрып қалған кезде тасымал бағасы күрт өсті. Бұл салада тасымал құнына әлдеқайда күшті әсер ететін көптеген басқа фактор бар", – деп мәлімдеді ол.

Еуразиялық экономикалық одақта (ЕАЭО) тауарларды навигациялық пломбалар арқылы қадағалау 2026 жылдың ақпанынан бастап енгізіледі.