Несиелер мен ипотека Ұлттық банкте неліктен әзірге қатаңдатудан бас тартқандарын түсіндірді

Ұлттық банк төрағасы Тимур Сүлейменов неге реттеуші органдар әзірге несие беру талаптарын қосымша қатаңдатуды жоспарлап отырмағанын түсіндірді, - деп хабарлайды Tengri Home.

Поделиться

Журналистер Тимур Сүлейменовтен: бұл Ұлттық банктің Қаржы нарығын реттеу және дамыту агенттігімен бірлесіп борыштық жүктеме коэффициенттері (БЖК) мен қарыз алушының табысына қатысты берешек (БКТ) бойынша талаптарды қатаңдатудан, сондай-ақ ипотека бойынша жылдық тиімді сыйақы мөлшерлемесін (ЖТМС) төмендетуден бас тартқанын білдіре ме деп сұрады.

Тимур Сүлейменов бұл жерде әңгіме мүлдем бас тарту туралы емес екенін нақтылады:

"Біз осы кезеңде бұған дейін қабылданып, 2025 жылы күшіне енген және 2026 жылы қолданылатын шаралар жеткілікті деп шештік".

Ұлттық банк басшысы Қазақстанда кепілсіз тұтынушылық несиелеу бірнеше жыл бойы өте жоғары қарқынмен - 30 пайыздан аса өскенін еске салды. Бұл бес жыл бойы жалғасып, нарықты белгілі бір деңгейде "салқындатуды" талап етті.

"Әлеуметтік және қаржылық тұрақтылық тәуекелдері, төленбеген несиелердің жинақталуы, сондай-ақ инфляция мен бағамға қысым тұрғысынан салқындату қажет болды. Шамадан тыс сұраныс әрқашан бағаны жоғарылатады. Егер бұл импорттық тауарларға - тұрмыстық техникаға, "айфондарға" және тағы басқаларға сұраныс болса, ол әрине, валютаға деген сұранысқа да әсер етеді", - деп түсіндірді Ұлттық банк төрағасы.

Тимур Сүлейменов қабылданған шаралардың айтарлықтай тиімді болғанын атап өтті.

"Біз кепілсіз тұтынушылық несиелеу нарығындағы шамадан тыс өсімді айтарлықтай тежей алдық. Қазір, 1 маусымдағы жағдай бойынша, бұл нарық бұрынғыдай 30 пайыз емес, шамамен 9,9 пайызға ғана өсіп отыр", – деді ол.

Сонымен қатар, Ұлттық банк басшысының айтуынша, реттеушілер тұтынушылық несиелеудің өсуін толығымен тоқтатуды қаламайды.

"Яғни өсім бар, оны ешкім тұншықтырған жоқ. Нарық әлі де дамуын жалғастырып жатыр, бірақ әлдеқайда қалыпты қарқынмен", - деді Тимур Сүлейменов.

Ол егер мұндай қарқын сақталса, әзірге қосымша қатаңдатулар жоспарланбайтынын қосты. Сайып келгенде, тұтынушылық несиелеу сауда мен ішкі сұранысты қолдайды.

"Бізде сауда көлемі үлкен - ЖІӨ-нің (жалпы ішкі өнім - ред. ескертпесі) шамамен 20 пайызын құрайды. Сондықтан сұраныстың бұл көзін толығымен шектеуге ниетіміз жоқ", - деп қадап айтты ол.

БЖК 0,5 деңгейінде сақтала ма, қаңтардан бастап БКТ-ны енгізу әзірге кейінге қалдырыла ма және ипотека бойынша ЖТМС дифференциалды болып қала бере ме деген нақтылаушы сұраққа Тимур Сүлейменов оң жауап берді:

"Иә, бізде болған көрсеткіштер өзгеріссіз қалады".

Бұған дейін біз қазақстандықтарға несие алу қиындамайтын болғанын хабарлаған едік. Ол кезде қаржы реттеушілері банктер және жұртшылықпен талқылаудан кейін бірқатар талаптарды қосымша қатаңдатудан бас тартқаны хабарланған болатын.

Google News арқылы жаңалықтарымызды қадағалаңыз

Ұлттық Банк Ипотека Несие