Нобель сыйлығын алу үшін түн ортасында өз елінен қашып шыққан Мария

Венесуэланың оппозициялық лидері, биылғы жылғы Нобель бейбітшілік сыйлығының лауреаты Мария Корина Мачадо бірнеше ай бойы жасырынып жүріп, Норвегияға жасырын жетті. Қауіпті сапар оның өміріне төнген қауіп-қатерге қарамастан, әлем алдында ашық көрінем деп қабылдаған батыл шешім екенін өзі де жасырмайды.

58 жастағы саясаткер Ослоға түн ортасында келіп, қонақүй балконында қолын бұлғап, ұзақ уақыт бойы көрмеген жақтастарымен жүздесті. Бұл – оның биылғы қаңтардан бері алғаш рет көпшілік алдына шығуы. Мачадоға Венесуэла билігі елден шығуға тыйым салып қана қоймай, егер Нобель сыйлығын алуға барса «қашқын» деп жариялайтынын ескерткен еді.

Ол Норвегияға жеткенше қауіпсіздік мақсатында жасырын жоспарланған операциямен жүріп, тіпті ондаған әскери бекеттің арасынан өтіп, жағалаудағы шағын балықшы ауылынан ағаш қайықпен теңізге шыққаны айтылады. Бұл операцияға АҚШ тарапынан да қолдау болғаны жөнінде ақпарат тарады. Мачадо бұл деректі жоққа шығармай, бірақ егжей-тегжейін ашпады.

Ослодағы жүздесу кезінде ол екі жыл бойы көрмеген балалары туралы айтып, жанарсыз өткен сәттердің ауырлығын бөлісті.

«16 айдан бері ешкімді құшақтап, қолынан ұстай алмадым. Бірнеше сағаттың ішінде өмірімдегі ең жақын адамдармен қайта қауышу — мен үшін үлкен бақыт», — деді ол BBC-ге берген сұхбатында.

Мария Корина Мачадоның Нобель сыйлығын алуы – Венесуэланың ұзаққа созылған саяси дағдарысындағы маңызды символдық оқиға. Халықаралық қауымдастық оны «елде демократияны бейбіт жолмен орнатуға тырысқан қайсар тұлға» деп таныды. Алайда Мадуро үкіметі оны «терроризм», «жалған ақпарат тарату», «конспирация жасау» сияқты айыптармен қудалап келеді.

Журналистердің «Елге қайта ораласыз ба?» деген сұрағына ол қысқа ғана жауап берді: «Әрине, ораламын. Қандай тәуекелге баратынымды жақсы білемін». Оның айтуынша, қазіргі таңда өзінің «ең қажет жері» — Осло, себебі Венесуэланың болашағы үшін халықаралық қауымдастықпен жұмыс істеу маңызды.

Ослодағы баспасөз жиынында Нобель комитетінің төрағасы да Мачадоның сапарын «өте қауіпті, ерекше жағдай» деп сипаттады.

«Түн ортасында оның аман-есен жеткенін көрудің өзі — эмоцияға толы сәт», – деді ол.

Оппозициялық лидер халықаралық қоғамдастықты Венесуэла режимінің «қылмыстық экономикалық схемаларын» – есірткі саудасы мен адам трафигін тоқтатуға көмектесуге шақырды. «Бұл билікті жай ғана диктатура ретінде қарастыру жеткіліксіз. Ол – тұтас қылмыстық құрылым», – деп мәлімдеді ол.