Nvidia мен OpenAI арасындағы 30 млрд долларлық жаңа келіссөз нені білдіреді?

Aikyn.kz жасанды интеллект стартапына Nvidia-ның қомақты инвестиция құю ниетін CNBC-ге сүйеніп талдайды.

CNBC растаған дерекке сүйенсек, Nvidia OpenAI-ға 30 миллиард долларға дейін инвестиция құю жөнінде келіссөз жүргізіп жатыр. Егер бұл раунд жүзеге асса, ЖИ бағытындағы стартаптың инвестицияға дейінгі бағалануы 730 миллиард долларға жетуі мүмкін. Бұл – технологиялық нарықта сирек кездесетін көлем, әрі OpenAI айналасындағы капитал жарысының жаңа кезеңін бастайды.

Дереккөздің айтуынша, бұл 30 млрд долларлық инвестиция OpenAI мен Nvidia қыркүйекте жариялаған 100 млрд долларлық инфрақұрылымдық әріптестікпен байланысты емес. Жаңа ұсыныс қандай да бір іске қосу кезеңдерімен (deployment milestones) байланыстырылмаған. Яғни қаражат белгілі бір датаорталық қуаты немесе суперкомпьютерлік хабтың іске қосылуы секілді шарттарға «байланбай», бөлек логикамен талқылануда.

Қыркүйектегі 100 млрд долларлық мәлімдеме технология секторын «селт еткізгені» рас. Ол кезде Nvidia бірнеше жыл ішінде, жаңа суперкомпьютерлік орталықтар іске қосылған сайын, OpenAI-ға кезең-кезеңімен инвестиция салуға міндеттеме алған еді. Алғашқы 10 млрд доллар бірінші 1 ГГвт қуат дайын болғаннан кейін құйылатын болған. Қазір талқыланып отырған 30 млрд доллар сол бұрынғы жоспардан бөлек болғанымен, Nvidia кейінірек сол стратегияға сай келетін келесі раундтарға қатысуы да ықтимал.

Алайда келісім әлі бекітілмеген. Дереккөз «мәміле аяқталған жоқ, шарттары өзгеруі мүмкін» дейді. Бұл туралы алғаш болып Financial Times жазды. Nvidia әзірге пікір білдіруден бас тартқан.

Соңғы айларда нарықта 100 млрд долларлық инфрақұрылымдық келісімнің тағдыры жиі талқыланып келеді. Әсіресе қаңтарда Wall Street Journal мәміле «тоқтатылып тұр» деп хабарлағаннан кейін сұрақ көбейді. Nvidia қарашадағы тоқсандық есебінде де сақтық танытып, OpenAI-мен ынтымақтастық немесе инвестиция бойынша «соңғы келісімдерге кепілдік жоқ» деген.

OpenAI басшысы Сэм Альтман болса, X (Twitter) желісінде компанияның Nvidia-мен жұмыс істегенді ұнататынын айтып, ақпараттық шуды «қайдан шыққанын түсінбеймін» деп қысқа қайырған. Ал Nvidia CEO-сы Дженсен Хуанг CNBC-де Джим Крамерге берген сұхбатында: «OpenAI-дың келесі қаржыландыру раундына инвестиция салатынымызға күмән жоқ» деген.

CNBC бұған дейін OpenAI басқа инвесторлармен де келісіп жатқанын, жалпы раунд көлемі шамамен 100 млрд долларға жетуі мүмкін екенін жазды. Ықтимал сценарийдің бірі – қаржыландырудың екі кезеңмен жабылуы. Алдымен Amazon, Microsoft және Nvidia секілді стратегиялық инвесторлар, кейін бұған кеңірек инвесторлар тобы қосылады. Егер осылай болса, бұл мәміле ЖИ-индустриядағы күш теңгерімін ғана емес, инфрақұрылым үшін бәсекені де жаңа деңгейге шығаруы мүмкін.