Оңтүстік Кореяда жаңа виза пайда болды ол кімдерге қолжетімді

Оңтүстік Корея 2024 жылдан бері жұмыс істеп келген пилоттық бағдарламаны аяқтап, Digital Nomad (Workation) визасын ресми түрде енгізді. Жаңа ереже қашықтан жұмыс істейтін шетелдік мамандарды тартып, елге көшіп келу процесін жеңілдетуі тиіс, деп хабарлайды Tengri Travel ел үкіметіне сілтеме жасап.

Оңтүстік Корея Әділет министрлігінің мәліметінше, бағдарлама 7 шілдеде ресми түрде іске қосылды. Елдің электронды үкімет порталындағы ақпаратқа сәйкес, виза иелері Оңтүстік Кореяда үш жылға дейін тұрып, жұмыс істей алады.

Бастапқыда виза бір жылға беріледі, кейін оны тағы екі рет ұзартуға болады.

Бұл ретте виза алу үшін белгілі бір табыс деңгейін растау қажет.

Негізгі шарттардың бірі - ең төменгі жылдық табысты растау. Талап өтініш берушінің жасы мен ол тұруды жоспарлап отырған өңірге байланысты.

Сеул, Инчхон және Кёнгидо провинциясынан тыс жерде тұруды жоспарлаған 18-ден 34 жасқа дейінгі адамдар үшін ең төменгі табыс жылына 37 мың доллар болуы тиіс. Егер өтініш беруші астаналық аймақта тұруды көздесе, кемінде 55 мың доллар табыс талап етіледі.

35 жастан асқан шетелдіктер үшін талап жоғары: өңірлерде тұрған жағдайда жылына 55 мың доллар, ал Сеул, Инчхон немесе Кёнгидода 74 мың доллар.

Қаржылық талаптан бөлек, үміткердің өз мамандығы бойынша кемінде бір жылдық жұмыс тәжірибесі болуы, соттылығының жоқтығы туралы анықтама ұсынуы және медициналық сақтандыруды рәсімдеуі қажет.

Егер өтініш беруші отбасымен бірге көшсе, табыс талабын есептеу кезінде жас шектеуі қолданылмайды.

Оңтүстік Корея бұл жаңа виза елге білікті қашықтан жұмыс істейтін мамандарды тартуға көмектеседі және экономика мен қызмет көрсету саласының дамуына ықпал етеді деп үміттеніп отыр.

Тағы оқыңыз: 2026 жылы қазақстандықтар паспортсыз қайда бара алады?

Google News арқылы жаңалықтарымызды қадағалаңыз