Орақ 2025: егіс алқабының 98% орылды

Елде астық жинау науқаны аяқталуға жақын.

Еккен егіні мен сепкен дәнін баптаған диқандар егіс алқабының 98 пайызын орып үлгерді. Анығын айтсақ, қамбаға 26 тонна астық бастырылды. Ала жаздай еңбек етіп, тер төккен шаруалар биыл рекордты көрсеткіштен дәмелі.

Орақ маусымы оңайға соқпауы мүмкін. Бұл бір ай бұрын синоптиктердің айтқан болжамы. Елдің біраз бөлігінде жауын-шашын 1 айға созылуы мүмкін деген жорамал жасалды. Бірақ бағымызға орай табиғат тосын мінез танытпады. Қамбамызды толтырып қана қоймай, астығымызды шетелге шығаруға мүмкіндік алдық.   

Назгүл Хатепова, ҚР Ауыл шаруашылығы министрлігі егіншілік департаментінің директоры:

- Қазіргі кезде біз екінші жыл қатарынан рекордтық өнім алуды жоспарлап отырмыз. Қазірдің өзінде 26,6 млгн тонна астық жиналған болатын. Орташа өнімжілік те қазір жоғары болып тұр. Жалпы Республика бойынша 16,9 центнер 1 гектардан шаруалар алып жатыр. Өткен жылы 16,2 болған болатын өнімділік. Бұл тек астық дақылдарында ғана емес. Майлы дақылдарда да биыл рекордтық өнім жоспарлап отырмыз.

Астықты державалардың алғашқы бестігінде тұрған еліміз биыл егілген бидай көлемін де көбейтті. 12 млн гектар. 99 пайызға жуығы орылып, әзірге 20 млн тонна астық жиналды. Арпа мен сұлы, жүгері бойынша да көрсеткіш жақсы. Соның арқасында ел тарихында алғаш рет 1 млн тонна дәнді-бұршақ және 4 млн тоннаға дейін майлы дақыл жиналған. Нәтижесінде бидай жаңа нарыққа ғана емес, экспорт бойынша байланысымыз үзіліп қалған Қырғызстан, Әзербайжан, Армения мемлекеттеріне де жөнелтіліп жатыр. 

 Зейнолла Сайфидинұлы, “Kazgrain” Ұлттық экспорттаушылар қауымдастығының төрағасы:

- Бұл нені білдіреді? Қазақстан дұрыс жолда дамып келе жатқанын көрсетеді. Біз оны әрі қарай дамытатын жағдайда жаңа технологияларды, автоматтандырулы, жаңа техникаларды қолданатын болсақ жұмысшылардың кәсібилігін арттыратын мүмкіндік туғызатын болсақ Қазақстан бұдан да жоғары көрсеткішке жеткізуі мүмкін. Бұл жерде атап өтетіні біз ұмытпайық, 90-шы жылдары Қазақстанның экспорттық потенциалы 30 млн тоннадан асқан.

Ауыл шаруашылығы тарапынан диқандарға көрсетілетін көмек түрі көбейді. Бұған дәлел: биыл қаржыландыру көлемі алғаш рет 1 трлн теңгеге жетті. Үкімет келер жылғы көктемгі дала жұмыстарына қазірден кірісіп кетті. 1 қазаннан бастап қаржыландыру тетігі іске қосылған. Лизинг бағдарламасы аясында 8 мыңнан астам техника сатып алуға 253 млрд теңге болатын өтінім түсті. 2 млн тонна тұқым дайындалғаны тағы бар. Бұл қажеттіліктің 91 пайызын құрап отыр. Осылайша қолдау шаралары мен диқандардың белсенділігінің арқасында келер жылғы астық көрсеткіші тағы жаңарады деген сенім бар.

Шерхан Абзалұлы