Өскеменде подъезд тұтқасын ұстаған жас жігітті тоқ соғып, жүрегі тоқтап қалған

Qazaq24.com, Egemen.KZ дереккөзінен алынған мәліметтерге сүйене отырып мәлімдеме жасады..

Өскемен қаласында 25 желтоқсан күні кешке бес қабатты тұрғын үйде төтенше жағдай орын алып, соның салдарынан жас жігіт ауыр халге түсті. Подъезд есігінен электр тоғы ұрып, ол ауруханаға жеткізілді, деп хабарлайды Egemen.kz.

Тұрғындардың айтуынша, Протозанов көшесі, №31 үйдің бірінші подъезіндегі домофоны бар кіреберіс есік бір ай бойы адамдарды тоқпен соғып келген. Алайда мәселе тиісті орындар тарапынан шешілмей, соның салдарынан қайғылы жағдай орын алған.

«Бүгін, 25 желтоқсанда, үлкен қайғылы жағдай болды. Жігітті ток қатты соққаны сонша, ол ұшып. Біз бірден жедел жәрдем шақырдық. Дәрігерлер келген соң реанимациялық шаралар жүргізді, жүрегі тоқтап қалған. Жігітті ауруханаға алып кетті, қазір жансақтау бөлімінде.

Бұған кім жауап береді? Неге ешкім ештеңе істемеді, апат болғанша күтті ме? Біздің подъезде көп қарт адамдар тұрады, егер тағы біреуді тоқ ұрса, соңы өте ауыр болуы мүмкін», дейді подъезд тұрғындары.

Оқиға туралы ақпарат қала әкімдігіне жеткізілді. Электр тоғының ағып кету себептерін анықтау үшін оқиға орнына «Исток» көппәтерлі тұрғын үйді басқару, күтіп-ұстау қызметкерлері шақырылды.

«Электр тоғымен зақымдану фактісі тіркелді. Алдын ала дерек бойынша, тоқ көзі «Алма домофон» ЖШС қызмет көрсететін ұйымға тиесілі болуы мүмкін. Оқиға орнына тұрғын үй қатынастары бөлімі келді. Қажетті тексеру және қалпына келтіру жұмыстары жүргізілді.

Сондай-ақ азаматтардың өмірі мен денсаулығына төнетін қауіптің алдын алу мақсатында зақым келтірген нысан электр желісінен ажыратылды», деп түсіндірді Өскемен қаласының әкімдігі.

Кейінірек электр тоғының ағып кетуіне есік маңында орнатылған прожектор шамы себеп болуы мүмкін екені хабарланды. Ол ажыратылып, қауіп жойылды. Оқиғаға қатысты жауапкершілікті тиісті органдар анықтайтын болады.

Соңғы жаңалықтар