Павлодар өңірінде соңғы үш жылда өндірістегі жазатайым оқиғалардан 20 адам көз жұмған

Мемлекеттік еңбек инспекциясы комитеті Павлодар облысы бойынша департаментінің мәліметінше, өңір кәсіпорындары мен ұйымдарында 2025 жылы 104 жазатайым оқиға тіркеліп, олардың салдарынан 113 адам зардап шеккен. Оның ішінде 66 адам ауыр жарақат алып, 7 адам өлімі тіркелген.

— 2024 жылы 103 жазатайым оқиға тіркеліп, 112 зардап шеккен адам анықталған. 78 адам ауыр зардап алып, 9 адам көз жұмған. Ал 2023 жылы тіркелген 106 жазатайым оқиғадан 111 адам зардап шеккен (оның 65-і ауыр жарақат алған). Төрт оқиға адам өлімімен аяқталған. Зардап шеккендердің басым бөлігі тау-кен — металлургия саласында, бюджеттік ұйымдарда, шағын бизнес субъектілерінде және құрылыс саласында тіркелген. Өндірістік оқиғалардың негізгі себептері — жұмыстың қанағатсыздандырарлық деңгейде ұйымдастырылуы, зардап шегушінің абайсыздығы және еңбек қорғау мен қауіпсіздік талаптарының бұзылуы, — деп хабарлады Kazinform тілшісіне департамент басшысының міндетін атқарушы Абылай Сабыров.

Жазатайым оқиғаларда ең жиі кездесетіні — адамдардың биіктен құлауы, қозғалмалы, көкте қалықтап жүретін, айналмалы заттар мен бөлшектердің әсері. Өткен жылғы статистикалық деректерге үңілсек, кәсіпорындар арасында ең көп жарақаттанған жұмыскерлер «Қазхром» ТҰҚ» АҚ филиалы — Ақсу ферроқорытпа зауытына тиесілі — 10 адам. Сондай-ақ «Еуроазияттық энергетикалық корпорациясы» АҚ филиалы — «Шығыс» кенішінде — 6 адам, «СтеклоМир KZ» ЖШС — 4 адам, «Богатырь Көмір» ЖШС — 5 адам, «Проммашкомплект» ЖШС — 3 адам, «R.W.S. Concrete» ЖШС — 2 адам, «ПЭТК» АҚ — 2 адам, «Смарт Автобус ПВ» ЖШС — 4 адам және «Қазақстан алюминийі» АҚ филиалы электр стансасында 2 адам өндірістік жарақат алған.

Ал 2025 жылы өлімге әкелген жазатайым оқиғалар «Богатырь Көмір» ЖШС-де тіркеліпті — 2 адам қаза тапқан. Сондай-ақ «Строй-Дизайн PV» ЖШС, «ҚАЖсервис» ЖШС, «Қазхром» ТҰҚ» АҚ филиалы — Ақсу ферроқорытпа зауыты, «МК Евразия-Агро» ЖШС мен «Гамма Сарыкөл» ЖШС-нің әрқайсында кісі өлімімен аяқталған бір жазатайым оқиғадан тіркелген.

Соңғы жылдары тіркелген ең қайғылы оқиғалардың бірі — 2024 жылдың қаңтар айында Майқайың алтын кенішінде автобуспен құрдымға түсіп қаза тапқан 4 құтқарушының өлімі. Құтқарушылар «Кәсіби әскерилендірілген авариялық-құтқару қызметтерінің республикалық орталық штабы» ЖШС ПФ мекемесінде еңбек еткен еді.

— Өкінішке қарай, өндірістік жазатайым оқиғалардан зардап шеккен адамдардың жұмыс берушіден келтірілген материалдық зиянды өтеу нормасы еңбек заңнамасында қарастырылмаған. Осы себепті зардап шеккендер азаматтық сотқа өз беттерімен жүгінеді. Ал қылмыстық істер бойынша мемлекеттік еңбек инспекциясының материалдары тергеулер аяқталғаннан кейін аумақтық полиция органдарына жолданады, — деп қосты департамент өкілі.

Қазіргі уақытта елімізде 2024–2030 жылдарға арналған «Еңбек қауіпсіздігі» тұжырымдамасын іске асыру бойынша жұмыстар жүргізіліп жатыр. Бұл құжат еңбек қауіпсіздігі саласында жұмыс берушілерге қойылатын талаптарды оңтайландыруға бағытталған шаралар кешенін қамтиды. Мақсаты — өндірістік жарақаттанушылықты төмендету және тиісті мемлекеттік бақылауды қамтамасыз ету.

Департамент басшысы аймақта өндірістік оқиғаларды алдын алу және кәсіби аурулардың профилактикасы бойынша қабылданатын шаралар аясында 33 кәсіпорында «Нөлдік жарақаттанушылық — Vision Zero» тұжырымдамасы, 22 еңбек ұйымында «Халықтық бақылау» жобасы енгізілгенін атап өтті. Бұл кәсіпорындағы еңбек қауіпсіздігін тікелей бақылауға мүмкіндік беріп отыр. Аймақ кәсіпорындарында 881 өндірістік кеңес жұмыс істейді, олардың міндетіне өндірістік жарақаттанушылықты болдырмау және жұмыс орындарындағы еңбек жағдайларын тексеруді ұйымдастыру кіреді.

Еске сала кетейік, биылғы қаңтар айында «Богатырь Көмір» жұмысшысы өндірістегі жазатайым оқиға салдарынан көз жұмды.

Ал оның алдында аталған кәсіпорында жұмысшы тоққа түсіп қаза тапты.