Павлодарда мас күйде әрі куәліксіз көлік жүргізген жасөспірім ұсталды

Департаменттің мәліметіне сүйенсек, достарымен бірге сайран салып жүрген жасөспірімді тәртіп сақшылары қала көшелерін патрульдеу кезінде қолға түсірген.

Құқық қорғау органдары анықтағандай, ол көлікті ата-анасынан алған. Тексеру барысында оның жүргізуші куәлігі жоқ екені және алкогольдік мас күйде болғаны белгілі болды.

— Кәмелетке толмағанға қатысты әкімшілік материал толтырылды. Сонымен қатар оның заңды өкілі де жауапкершілікке тартылды, — деді Павлодар облысы ПД қоғамдық қауіпсіздік басқармасының бастығы Азамат Күркебаев.

Бұған дейін елімізде жүргізушілердің мас күйін тексеру ережелеріне өзгерістер енгізу жоспарланып отырғаны хабарланған. Атап айтқанда, медициналық куәландыру жүргізу тәртібін нақтылау және адамның жағдайын бағалаудың дәлдігі мен толықтығын арттыру ұсынылып отыр.

Еске сала кетейік, жыл басынан бері Жамбыл облысы аумағында 2000-нан астам жасөспірім полицияға жеткізілген.