Павлодарда мұз айдындары ашылды

Қыс маусымында Павлодар қаласы бойынша барлығы 24 мұз айдыны жұмыс істейді.

 Биыл алғаш рет қаланың орталық алаңында екі бірдей сырғанақ тебу алаңы ашылады. Бұл тұрғындар мен қонақтар үшін қысқы демалысты тиімді әрі қызықты өткізуге мүмкіндік береді. Сонымен қатар коньки мен шаңғыны тегін пайдалану қарастырылған.

Павлодарлықтар әдетте мұз айдындарының ашылуын асыға күтеді. Облыс орталығында екі шаңғы базасы мен жабық спорт алаңдарынан бөлек көп қабатты тұрғын үйлердің аулаларында жасанды мұз айдындары орнатылды. Мұнда балалар хоккей ойнап, коньки тебеді.

БЛИЦ:

- Қазіргі таңда қаламызда өте керемет сырғанақ алаңдары ашылып жатыр. Біз достарымызбен ана жылы барып уақыт өткізген болатынбыз. Осы жылы әлбетте барамыз.

- Баяғыда мектеп кезінде шаңғы теуіп өзіміз ойнайтынбыз, шаңғы тепкенді мен өзім қатты ұнатамын.

- Қар жауды, өте керемет! Коньки тебеміз, сырғанаққа барамыз, өте керемет.

Жасанды мұз айдындарының сапасын спорт және дене шынықтыру бөлімінің мамандары бақылайды. Халық көп баратын орындарда қауіпсіздікті қамтамасыз ету үшін кезекшілік ұйымдастырылады.

Мақпал Қаржаубай, Павлодар қаласы әкімінің баспасөз хатшысы:

- Үй аулаларында мұз айдындары толық жасақталды. Қазіргі таңда  мұзды қатыру жұмыстары жүріп жатыр. Ауа райы жақсы болса, барлық сырғанақтар мен мұз айдындары желтоқсанның жиырмасында ресми түрде ашылады. Бастапқы кезеңінде 3-4 апта бұрын су құйылады. Мұздың қалыңдығы 20 см болуы керек.

Мұз айдындарынан бөлек биыл қыста Павлодарда балалар мен ересектерге арналған үлкен мұз сырғанақтары орнатылады. Ал шаңғы мен коньки тегін ұсынылады. Бұдан бөлек баршаға мерекелік көңіл күй сыйлайтын әдемі безендірілген қысқы қалашық өз жұмысын бастайды.

Қарлығаш Қасиетова, Марат Игіліков