Павлодарда Заң мен тәртіп фотокөрмесі ашылды

Павлодарда «Заң мен тәртіп» фотокөрмесі ашылды. Оған полицейлердің күнделікті жұмысы көрініс тапқан фотосуреттер қойылды.

Тәртіп сақшыларының көшелерді патрульдеуінен бастап, құтқару жұмыстарына қатысқан сәттеріне дейін көрмеде қамтылған. Әр кадр нақты қызмет кезінде түсірілген.

Көрмеге қойылған фотосуреттердің барлығы жарқын және әсерлі кадрлар. Кезекшілік, шақырту, бекеттегі жұмыс, адамдарды құтқару сәттері. Жалпы мұнда полицейлердің қауіп пен қатерге, әрі қызықты сәттерге толы күнделікті жұмысы көрініс тапқан. Сурет авторлары - кәсіби фотографтар мен полиция қызметкерлерінің өздері.

Жанар Біләлова, Павлодар облысы Полиция департаментінің ресми өкілі:

- Фотокөрме арқылы полиция қызметкерлерінің жұмысы шынайы шытырман оқиғаларға толы, жан-жақты екенін көрсеткіміз келді. Рас, кейде оның бәрі кадрдан тыс қалып жатады. Іс-шарада әр кезеңдегі, мәселен, 50-ші, 60-шы жылдардағы фотосуреттер бар. Бұл кісілер бүгінде біздің үлгі алып жүрген ардагер қызметкерлеріміз.

Көрмеде қызметте батылдық танытқан полиция қызметкерлерінің суреттері ерекше орын алады. Олардың ішінде Мұрат Нұрсейітов пен Баянбек Жүнісов бар. Бірнеше жыл бұрын олар өз бастарын қатерге тігіп, қарсы жолаққа шыққан жүк көлігінің жолын жауып, он сегіз баланың өмірін сақтап қалған еді. Осылайша, үлкен жол апатының алдын алды. Ұзақ оңалтудан кейін батырлар қайтадан қатарға қосылды. Бүгінде ішкі істер органдарында қызметін жалғастыруда.

Мұрат Нұрсейітов, Баянауыл аудандық Полиция бөлімінің полиция старшинасы:

- Балалар мінген көліктің қауіпсіздігін қамтамасыз ету тапсырылды. Бүлдіршіндерді қайткенде де аман-есен жеткізу керек. Осы сәтте жүк көлігі қарсы жолаққа шығып кетті. Оны басқаша тоқтатудың жолы жоқ. Біз бір-бірімізге қарадық та, өзіміз тоқтатамыз деп қас пен көздің арасында шешім қабылдадық.

«Заң мен тәртіп» фотокөрмесі жай ғана экспозиция емес. Бұл батылдықты, антқа адалдықты мойындау және күн сайын азаматтардың тыныштығын сақтайтын қызметкерлерге деген айрықша құрмет.

Авторлары: Достық Талғатұлы, Валентина Леонова, Дәулет Қошқарбаев