​Перу үкіметі Мексикамен дипломатиялық қатынастарды үзгенін мәлімдеді

Перу үкіметі елдің бұрынғы премьер-министрі Бетси Чавеске Мексика елшілігінің Лимадағы резиденциясында саяси баспана берілуіне байланысты Мексикамен дипломатиялық қатынастарды үзгенін мәлімдеді. Бұл туралы АА хабарлады.

Перу сыртқы істер министрі Уго де Села бұл жағдайға қатысты баспасөз конференциясында пікір білдірді.

«Бұл достыққа жат әрекетке жауап ретінде және осы елдің қазіргі және бұрынғы президенттерінің Перудің ішкі істеріне бірнеше рет араласқанын ескере отырып, Перу үкіметі бүгіннен бастап Мексикамен дипломатиялық қатынастарды үзу туралы шешім қабылдады», — деді министр.

Ол Мексика үкіметінің іс-әрекетін сынға алып, былай деп мәлімдеді: «Бүгін біз үлкен таңданыспен және өкінішпен бұрынғы премьер-министр Бетси Чавестің қазіргі уақытта Перудегі Мексика елшілігінің резиденциясында саяси баспана сұрағанын білдік. Ол бұрынғы президент Педро Кастильо ұйымдастырған деп саналатын төңкеріс әрекетіне қатысы бар тұлға ретінде қарастырылуда».

Еске сала кетсек, 2023 жылдың 23 мамырында Перу Конгресі Мексиканың сол кездегі президенті Андрес Мануэль Лопес Обрадорды елдің ішкі істеріне араласқаны үшін «persona non grata» деп жариялаған болатын.

Сондай-ақ, Мексиканың бұрынғы Перу президенті Педро Кастильоның отбасына саяси баспана беруі де екі ел арасындағы қарым-қатынасты шиеленістірген еді.

Бүгін, 12:02