Петропавл Ресейдікі деген әйел бес жылға сотталды

Солтүстік Қазақстан облысының тұрғыны TikTok-тағы арандатушылық пікірі үшін бас бостандығынан айырылды, деп хабарлайды Arasha.kz.

TikTok-тағы арандатушылық сипаттағы пікірі өңірдің 40 жастағы тұрғынын бостандығынан айырды. Сот Татьяна Л.-ны Қазақстан Республикасының аумақтық тұтастығын бұзуды насихаттағаны үшін кінәлі деп танып, оған бес жылға бас бостандығынан айыру жазасын тағайындады.

Тергеу нұсқасы бойынша, өткен жылы әйел Петропавл қаласының атауы талқыланған видеоның астына пікір қалдырған.

Қылмыстық іске себеп болған сөйлем былай жазылған:
«Петропавл – бұл Ресей, бірақ нақ Қазақстан емес... ал қазір ұрлап алғысы келеді, ештеңе етпес, жақында бәрі өз орнына келеді... сосын біз күлетін боламыз».
Пікір ашық қолжетімділікте жарияланып, әлеуметтік желілерде тез тарап кеткен.

Видео өшірілгенге дейін 5 мыңнан астам лайк, 3 мыңнан астам пікір жинап, жүздеген рет сақталып, бөлісілген.

Пайдаланушылардың бірі e-Otinish сервисі арқылы полицияға жүгініп, пікір авторымен профилактикалық әңгіме жүргізуді сұраған.

Ұлттық қауіпсіздік комитетінің экстремизмге қарсы күрес басқармасы аккаунт иесін анықтады. Пікір жазылған телефон тәркіленіп, тексерілді — аккаунттың оған тиесілі екені расталды.

Сотта әйел өз кінәсін мойындамады.

Ол пікірді расымен қалдырғанын, бірақ әжесі айтып берген «тарихи фактіні» меңзегенін түсіндірді. Оның айтуынша, ол «өз ойын сауатты жеткізе алмаған», ал TikTok алгоритмдері ойын толық жазуға мүмкіндік бермеген-мыс. Сондай-ақ сотталушы бұған дейін сепаратизм үшін қылмыстық жауапкершілік бар екенін білмегенін мәлімдеді, деп жазды HALYQSTAN телеграм арнасы.

Дегенмен, саясаттанушының қатысуымен өткен соттық психологиялық-филологиялық сараптама басқаша қорытынды шығарды. Сарапшы бұл сөздерде Қазақстанның аумақтық тұтастығын бұзуды насихаттау белгілері бар екенін көрсетті.

Сотта әлеуметтік желі пайдаланушыларының әйелге жауапкершілік туралы ескертіп, тіпті Қылмыстық кодекстің нормаларын мысалға келтіргені де айтылды. Бұған жауап ретінде ол «ешкімнен де, ештеңеден де қорықпайтынын» мәлімдеген.

Скриншоттарды, тексеру хаттамаларын, куәгерлердің айғақтарын және сарапшы қорытындысын қоса алғанда, барлық дәлелдемелерді зерттей келе, сот сотталушының іс-әрекетін саналы түрде жасаған деген шешімге келді.

Сот үкімімен Татьяна Л. Қазақстан Республикасы Қылмыстық кодексінің 180-бабының 2-бөлігі бойынша кінәлі деп танылды.

Оған орташа қауіпсіздік мекемесінде бес жылға бас бостандығынан айыру жазасы тағайындалды. Әйел сот залында қамауға алынды. Үкім әлі заңды күшіне енген жоқ.