Полиция Алматыда Канье Уэстің концертіне жалған билеттер сатылатыны туралы ескертті

Алматы полицейлері интернет арқылы Канье Уэст концертіне билеттерді заңсыз сату әрекетінің жолын кесті. Тәртіп сақшылары қазақстандықтарды билеттерді тек ресми сервистер арқылы сатып алуға шақырады, деп хабарлайды Tengrinews.kz.

Полицейлер күдікті хабарландыруды әлеуметтік желілерге мониторинг жүргізу барысында анықтаған.

Instagram-дағы бұл жарияланымды көру

Алматы қаласының ПД жарияланымы (@almaty.police)

"Әлеуметтік желілерді бақылау кезінде полицейлер алдағы концертке билет сату туралы хабарландыру жариялаған жас жігітті анықтады. Оның құқыққа қайшы әрекеті дер кезінде тоқтатылды - ол өз ойын соңына дейін жеткізіп, сатып алушыларды алдап үлгермеді", - делінген полиция хабарламасында.

Полиция өкілдерінің мәлімдеуінше, ірі мәдени және спорттық іс-шаралар қарсаңында тәртіп сақшылары алаяқтық фактілерін және жоғары сұраныс арқылы заңсыз табыс табу әрекеттерін анықтау үшін әлеуметтік желілерге, хабарландыру сайттары мен интернет-платформаларға тәулік бойы мониторинг жүргізеді.

Полицейлер қала тұрғындары мен қонақтарын билеттерді тек ресми сервистер арқылы сатып алуға, бейтаныс адамдарға ақша аудармауға және интернеттегі күмәнді хабарландыруларға сенбеуге шақырады.

Еске сала кетейік, Канье Уэсттің Алматыдағы алғашқы концертіне билеттерді сату 21 шілдеде басталды, ал концерттің өзі 14 тамызда Орталық стадионда өтеді. "Қайрат" футбол клубы өз стадионын әлемдік жұлдызға беріп, еурокубоктардың үшінші іріктеу кезеңіндегі ықтимал үй матчін басқа алаңға ауыстырды.

Алматыда танымал рэпердің ауқымды жанды дауыстағы концерті алғаш рет өтеді.

Google News арқылы жаңалықтарымызды қадағалаңыз