Politico: Украина Ресеймен соғысты тоқтату туралы келісімге келмейінше, АҚШ қауіпсіздік кепілдіктері туралы келісімге қол қоймайды

Екі еуропалық дипломат пен АҚШ-тың жоғары лауазымды шенеунігінің мәліметінше, Вашингтон бұл ұстанымын Украинаға ашық мәлімдеген, деп хабарлайды Arasha.kz.

Сонымен қатар, басылым бейбітшілік процесінің тежеліп тұрғанын жазады. Бұған негізгі мәселенің — Ресейдің Украина әскерін бүкіл Донбасс аумағынан, соның ішінде РФ армиясы басып алмаған аймақтардан шығару туралы талаптарының шешілмеуі себеп болып отыр.

Басылым дереккөздері жұма күні Украина президенті Владимир Зеленский мен АҚШ мемлекеттік хатшысы Марко Рубио қатысқан Мюнхен қауіпсіздік конференциясы кезінде қандай да бір ілгерілеушілік болады деп күтпейді.

Украина соғысты тоқтату туралы кез келген келісім үшін Ресейдің қайта басып кіруіне жол бермейтіндей АҚШ пен басқа да батыстық одақтастардан сенімді қауіпсіздік кепілдіктерін алуы керек деген ұстанымда.

Politico Украина, Ресей және Трамп әкімшілігі арасындағы келіссөздерді былай сипаттайды:

«Өткен жылы Трамп қызметіне кіріскеннен кейін, ол Украина мен Ресейді соғысты тоқтатуға итермелеп, жиі Киевті жеңілдіктерге баруға мәжбүрледі. Дипломатия үнемі таныс шеңбер бойымен жүріп жатыр: Трамп дедлайн белгілеп, соғыс қимылдарын тез арада аяқтауға шақырады; Украина қатысуға бірден келіседі, бірақ Ресей қарсылық танытады; соңғы сәтте Ресей келіссөздерді ұсынады, содан кейін екі тарап ортақ мәмілеге келе алмағандықтан, талқылаулар нәтижесіз аяқталады».