Президент бекіткен құжат ішкі саясат саласындағы жұмысты жүйелеп, үйлестіруді көздейді Ерлан Қарин

Президент Бурабайда өткен Ұлттық құрылтайдың ІV отырысында сарапшылар мен қоғам өкілдерінің ішкі саясат саласындағы тұжырымдамалық құжат қабылдау бастамасын қолдап, бүгін «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлыққа қол қойды. Мемлекеттік кеңесші Ерлан Қариннің айтуынша, бұл құжат елдің ішкі саясатын жүйелеуге және оның идеялық бағытын айқындауға бағытталған, - деп хабарлайды Aikyn.kz.

- Президент Әкімшілігі жарты жылдан астам уақыт бойы түрлі диалог алаңдарында Ұлттық құрылтай мүшелерінің, сарапшылардың, қоғамдық және ғылыми ұйымдар өкілдерінің қатысуымен пікірталастар ұйымдастырды.

Сарапшылық талқылаулардың нәтижесінде ішкі саясат саласында жүргізіліп жатқан жұмысты жүйелейтін тұжырымдамалық құжаттың жобасы әзірленді.

Бүгін Мемлекет басшысы «Қазақстан Республикасы ішкі саясатының негізгі қағидаттары, құндылықтары мен бағыттарын бекіту туралы» Жарлыққа қол қойды.

Ішкі саясат саласындағы жұмысты жүйелеп, үйлестіруді көздейтін құжат бірінші кезекте мемлекеттік органдарға арналған. Сонымен қатар бұл қоғамға жүргізіліп отырған мемлекеттік саясаттың идеялық мәнін және еліміздің болашақтағы бейнесінің айқын бағытын түсінуге мүмкіндік береді, - деді Ерлан Қарин.