Президент сұхбаты: сарапшылар пікір білдірді

Еуразияның төрінде орналасқан Қазақ елінің мүмкіндігі зор. Еуроодақ сарапшылары осылай дейді. Олар мұндай пікірді Президент Қасым-Жомарт Тоқаевтың «Түркістан» газетіне берген сұхбатымен танысқан соң білдірді. 

Сарапшылар алдағы жылдары сирек және басқа да аса маңызды металдарға сұраныс арта түсетінін және бұл салада біздің ел үшін жаңа мүмкіндіктер ашылатынын айтады. «Себебі мұндай материалдар стратегиялық факторға айналып отыр. Ал дәл осы тұста еліміз сирек кездесетін минералдар қоры бойынша әлемдік көшбасшылардың біріне айналуы мүмкін екенін де жоққа шығармайды. Сондықтан Қазақстанның Еуропалық Одақ елдерімен ынтымақтастықты тереңдетуі өте ұтымды қадам», - деп бағалайды шетелдік сарапшылар. 

Кадир Дуран, Bruxelles Korner басылымының бас редакторы:

- Қазақстан минералдық-шикізат қорына өте бай. Сирек және аса маңызды пайдалы қазбалар бұрын Еуропада да, басқа елдерде де онша еленбей келген еді. Енді біз олардың қажеттілігін іс жүзінде мойындауға мәжбүрміз. Орталық Азияда Қазақстан осындай ресурстарға бай екені белгілі. 

Еуропалық сарапшылар президенттің салық реформасына қатысты ұстанымын құптайды. Экономикада тұрақты өсім үшін мемлекет, бизнес және азаматтар арасындағы серіктестікке ықпал жасап жатқаны дұрыс қадам деп есептейді.

 Альберто Туркстра, Diplomatic World сараптамалық орталығының жоба менеджері:

- Мені бұл сұхбатта ерекше тәнті еткен жайт – Президент бұл қадамды ұпай жинау үшін емес, Қазақстанның экономикалық болашағын тұрақты ету үшін жасап отыр. Бұл қысқа мерзімде бәріне ұнамауы мүмкін, бірақ болашақта оның нәтиже берері сөзсіз.