Психологтар, логопедтер және дефектологтар: депутаттар жалақыны қайта қарауды талап етті

Бүгін Құрылтайда бірден екі депутат ерекше қажеттіліктері бар балалар мен ересектерге көмектесетін педагогтер мен мамандардың жалақысы мен жұмыс жүктемесі мәселесін көтерді. Сөз психологтар, логопедтер, дефектологтар, әлеуметтік қызметкерлер және педагог-ассистенттер туралы болып отыр, деп хабарлайды Tengrinews.kz тілшісі.

Тиісті депутаттық сауалдарды Лариса Ли мен Айнагүл Балташева жолдады.

Депутат Лариса Ли пациенттерді оңалту және әлеуметтік бейімдеумен айналысатын мамандардың еңбекақысындағы айырмашылыққа назар аударды.

Оның дерегінше, бұл салада 12 мыңға жуық адам жұмыс істейді. Бұл ретте жалақы мөлшері мекеме мен лауазымға байланысты айтарлықтай өзгеше болуы мүмкін. Мысалы, денсаулық сақтау ұйымдарындағы психологтар, логопедтер және басқа да медициналық емес бейіндегі мамандар "өзге персонал" санатына жатқызылуы мүмкін.

"Бұл бір пациентке көмек көрсетуге қатысатын, бірақ кәсіби мәртебесі әртүрлі мамандардың еңбекақысындағы айтарлықтай алшақтыққа әкелуі мүмкін", - делінген депутаттық сауалда.

Нәтижесінде кейбір қызметкерлер сабақтас мамандық иелеріне қарастырылған үстемеақыларды алмайды.

Сонымен қатар депутат психикалық денсаулық саласындағы кадр тапшылығы мәселесін де атап өтті.

"Қолда бар мәліметтерге сәйкес, психикалық денсаулық сақтау ұйымдарында 300 мыңнан аса азамат есепте тұрса, тиісті бейіндегі әлеуметтік қызметкерлер мен психологтардың штаттық бірлік саны шамамен 163-ті құрайды", - делінген сауалда.

Лариса Ли еңбекақы төлеу жүйесін қайта қарауды, бейінді мамандарды жеке лауазымдық санаттарға бөлуді, жоғарылату коэффициенттері мен үстемеақылар белгілеуді ұсынады. Қосымша шығыстарды бюджеттік қаржыландыру есебінен қамтамасыз ету ұсынылып отыр.

Депутат Айнагүл Балташева ерекше білім беру қажеттіліктері бар балаларға қолдау көрсететін педагог-ассистенттердің жүктемесі мен еңбекақысы мәселесін көтерді.

Ол келтірген мәліметтерге сәйкес, Қазақстанда осындай 237 мыңға жуық бала бар, олармен 6,5 мыңға жуық педагог-ассистент жұмыс істейді.

Мәселе жүктемені есептеудің бірыңғай ережелерінің жоқтығында болып отыр. Әр өңірде мамандардың жұмыс уақыты әртүрлі есептелуі мүмкін, бұл жалақы көлеміне де әсер етеді.

Балташева педагог-ассистенттердің нормативтік оқу жүктемесін аптасына 16 сағат деңгейінде заңнамалық түрде бекітуді ұсынды. Бұл ретте әңгіме жалпы жұмыс уақытының ұзақтығы туралы емес, балалармен тікелей жұмыс істеу нормасы туралы болып отыр.

Сонымен қатар депутат мамандардың дайындыққа, педагогтермен және ата-аналармен өзара іс-қимылға, сондай-ақ құжаттама жүргізуге жұмсайтын уақытын бөлек ескеру қажет деп санайды.

Педагог-ассистенттер үшін бүкіл ел бойынша жұмыс уақытын есептеу мен еңбекақы төлеудің бірыңғай ережелерін белгілеу ұсынылған.

Бұған дейін Ұлттық статистика бюросы қазақстандықтардың жасына, кәсіпорынның меншік нысанына және көлеміне қарай қанша жалақы алатыны туралы мәліметтерді жариялаған болатын. Статистика 2026 жылдың сәуіріне дейін толық жұмыс істеген қызметкерлердің орташа айлық атаулы жалақысын көрсетеді.

Тағы оқыңыз: "Ұнамаса, жұмыстан кет": қазақстандықтарды қалай тегін жұмыс істеуге мәжбүрлейді және жұмыс берушіні жауапқа тартуға бола ма?

Бізді Google-дың негізгі дереккөздер тізіміне қосыңыз