Алматыда электросамокаттардың жылдамдық шектеулерін қайта қарауды талап еткен тағы бір петиция пайда болды

Алматыда жалға берілетін электросамокаттарды пайдалану ережелеріне қатысты қоғамдық талқылау жалғасуда. Қазақстанның ePetition.kz ресми электрондық петициялар порталында кикшерингке енгізілген жылдамдық шектеулерін қайта қарауды талап еткен тағы бір петиция жарияланды, – деп хабарлайды Aikyn.kz сайты.

Петиция авторларының пікірінше, шілде айынан бастап енгізілген жаңа жылдамдық шектеулері — веложолақтарда сағатына 15 км, қала аумағында 10 км, ал мектептер, ауруханалар және жаяу жүргіншілер көп жүретін аймақтарда 6 км/сағ — Алматының жер бедерін ескермейді және электросамокаттарды көлік құралы ретінде тиімді пайдалануға кедергі келтіреді.

Жаңа петицияда авторлар веложолақтардағы ең жоғары жылдамдықты 25 км/сағ-қа дейін қайтаруды, қаланың қалған бөлігінде 15–20 км/сағ деңгейінде белгілеуді, ал 10 км/сағ шектеуін тек жаяу жүргіншілер көп шоғырланатын орындарда — саябақтарда, мектептер, балабақшалар мен медициналық мекемелердің маңында ғана сақтауды ұсынады. Сонымен қатар, бастамашылар қаладағы велосипед инфрақұрылымын одан әрі дамыту қажеттігін атап өткен.

Петиция авторлары қолданыстағы шектеулер әсіресе Алматының еңісті көшелерінде қозғалысты қиындатып, электросамокатты жұмысқа, оқу орнына немесе қоғамдық көлік аялдамасына жетудің ыңғайлы құралы ретінде пайдаланатын тұрғындарға қолайсыздық туғызатынын айтады.

Бұған дейін де осыған ұқсас бастама қоғамда қызу талқыланып, бұқаралық ақпарат құралдарының назарын аударған болатын. Қала тұрғындарының бір бөлігі жаңа шектеулерді шамадан тыс қатаң деп есептеп, оларды қайта қарауды қолдаса, енді бірі жаяу жүргіншілердің қауіпсіздігін қамтамасыз ету үшін қолданыстағы талаптарды сақтап қалу қажет деген пікірде.

Қазіргі уақытта петиция ePetition.kz ресми платформасында қол жинауды жалғастыруда. Егер қажетті қол саны жиналса, бастама уәкілетті мемлекеттік органдардың қарауына жіберіледі.