Путин Қазақстанға келетін болды: Тоқаев Ресей басшысымен телефон арқылы сөйлесті

Қазақстан Президенті Қасым-Жомарт Тоқаев Ресей Федерациясының президенті Владимир Путинмен телефон арқылы сөйлесті, деп хабарлайды Arasha.kz.

Әңгіме барысында Ресей басшысы Тоқаевты жаңа Конституцияны қабылдауға қатысты өткен жалпыұлттық референдумның сәтті өтуімен құттықтады.

Кездесу барысында тараптар екіжақты ынтымақтастықтың өзекті мәселелерін талқылады. Сонымен қатар Қазақстан президенті Ресей басшысының алдағы Қазақстанға сапарына ерекше мән берілетінін атап өтті.

"Ресей Президентінің мамыр айының соңына жоспарланған мемлекеттік сапары екі ел арасындағы стратегиялық әріптестік пен одақтастықты одан әрі нығайтуда маңызды рөл атқарады", – деді Қасым-Жомарт Тоқаев.

Өз кезегінде Владимир Путин бұл пікірмен келісетінін білдіріп, Астанада өтетін келіссөздердің маңызын атап өтті. Ол екі ел арасындағы ынтымақтастықтың барлық негізгі бағыттар бойынша қарқынды дамып келе жатқанын жеткізді.