Путин тағы да Украинадан Донбасты беруді талап етті

Ресей президенті Владимир Путин осы аптада АҚШ президенті Дональд Трамппен телефон арқылы сөйлесу кезінде соғысты тоқтату шарты ретінде Киевтен Донецк облысынан толықтай бас тартуды талап еткен, деп хабарлайды Arasha.kz.

Бұл туралы әңгіме барысымен таныс екі жоғары лауазымды шенеунік The Washington Post басылымына хабарлаған.

Сол әңгіменің барысында Путин Ресей әлі басып алмаған Запорожье мен Херсон облыстарынан бас тартуға дайын екенін де айтқан, дейді басылым дереккөздері. Бұл — Анкоридждегі саммитте айтылған мәлімдемелермен салыстырғанда белгілі бір прогресс ретінде қабылданған. Ақ үйдің кейбір өкілдері мұны солай түсінген, деп жазады The Washington Post.

Алайда жоғары лауазымды еуропалық дипломат басылымға: «Украиндар мұны солай қабылдай қоюы екіталай. Бұл — өз жерін тегін берумен бірдей», — деп мәлімдеген.

Шенеуніктердің айтуынша, Трамптың арнайы өкілі Стив Уиткофф жұма күнгі кездесуде Украина делегациясына Донецк облысын Ресейге беру мәселесінде қысым көрсеткен, өйткені бұл өңірдің халқы негізінен орыс тілінде сөйлейтінін атап өткен.

Сонымен қатар Дональд Трамптың өзі Путиннің талаптарына қатысты ашық пікір білдірмеген. Зеленскиймен кездесуден кейін ол екі тарапқа да: «Қай жерде тұрсаңдар, сол жерде тоқтаңдар», — деп мәлімдеген.