Қаңтарда Ұлттық қорға 323 млрд теңге түсті

2026 жылғы қаңтар айында Қазақстанның Ұлттық қорына 323,2 млрд теңге түсті. Бұл туралы Қаржы министрлігі хабарлады.

Ведомство мәліметінше, 2026 жылғы 1 ақпандағы жағдай бойынша Ұлттық қордың көлемі 39,74 трлн теңгеге жеткен. Есептік кезеңнің басында Қорда 39,64 трлн теңге болған.

Түсімдердің негізгі бөлігі мұнай секторынан түсті. Атап айтқанда, 183 млрд теңге корпоративтік табыс салығынан, 131,9 млрд теңге пайдалы қазбаларды өндіру салығынан, 7,7 млрд теңге өнімді бөлу туралы келісімдер бойынша Қазақстанның үлесінен жиналған. Сондай-ақ бонустар, экспортқа салынатын ренталық салық, айыппұлдар мен өзге де салықтық емес төлемдер есебінен түсімдер болды.

Сонымен қатар, республикалық меншікті жекешелендіруден 27,3 млн теңге, ауыл шаруашылығы мақсатындағы жерлерді сатудан 1,36 млн теңге түскен.

Қаңтар айында Ұлттық қордан республикалық бюджетке кепілдендірілген трансферт ретінде 230 млрд теңге бөлінді. Осы кезеңде мақсатты трансферттер немесе өзге де ірі шығындар тіркелмеген.

Осылайша, бюджетке қаражат бөлінгеніне қарамастан, мұнай секторынан түскен тұрақты түсімдердің арқасында қаңтар қорытындысы бойынша Ұлттық қордың жалпы көлемі артты.