Қаңтардың зейнетақысы желтоқсанда төленетіні рас па министрлік мәлімдеме жасады

АЛМАТЫ, 25 желтоқсан – Sputnik. Қаңтардың зейнетақысы желтоқсанда түседі деген ақпарат шындыққа жанаспайды, деп хабарлады Еңбек және халықты әлеуметтік қорғау министрлігі.

Мессенджерлер мен әлеуметтік желілерде 2026 жылғы қаңтар айының зейнетақысы 2025 жылғы 30 желтоқсанға дейінгі кезеңде аударылады деген ақпарат тарап жатыр. Министрлік түсініктеме берді.

"Зейнетақы мен жәрдемақыны төлеу бекітілген кестеге сәйкес жүргізіледі. Индексацияны ескере отырып, қаңтар айының зейнетақы төлемдері алушыларға 2026 жылдың қаңтар айында аударылады. Желтоқсан айының зейнетақы төлемдері толық көлемде жүргізілді", - дейді министрлік.

Ведомство азаматтардан жеке деректері таралып кетпеу үшін күмәнді сілтемелерге өтпеуді, тек ресми көздердегі ақпаратқа сенуді сұрады.

"Мемлекеттік қолдау шаралары туралы ресми ақпарат тек 1414 нөмірінен SMS-хабарламалар арқылы, сондай-ақ мемлекеттік органдардың ресми интернет-ресурстары арқылы таратылады", - делінген министрлік хабарламасында.