Қарыз даулары енді онлайн шешіледі

Елде 19 800 азаматтың есепшотындағы арест автоматты түрде шешілді. Бұл – нотариустардың қарыз өндіруге қатысты құжаттарын цифрландырудың нәтижесі.

Бұрын борышкерлер құжаттарға уақытылы қол жеткізе алмай, шағымдануда әлекке түсетін. Енді барлық рәсім онлайн форматқа ауысты. Азаматтар жеке кабинет арқылы хабарлама алып, қажет болса, бірден қарсылық білдіре алады. Егер қарсылық орынды болса, нотариус шешімді жояды. Сонымен қатар жаңа жүйе процесті ашық етіп, заңсыз әрекеттердің алдын алады. Бұл туралы Әділет вице-министрі баяндады. Бекболат Молдабековтың айтуынша, бұндай жаңашыл жоба азаматтардың құқықтарын қорғап, қаржы ұйымдарына деген шағымдар санын азайтады.

Бекболат Молдабеков, ҚР Әділет вице-министрі:

- Жыл сайын әділет органдарына 7 мыңға жуық шағым түсетін. Осы мәселелерге жауап ретінде барлық іс-әрекеттерді тіркеуді және тараптардың құқықтарын қорғауды қамтамасыз ететін цифрлық механизм енгізілді. Бұл азаматтардың құқықтарын қалпына келтіру және теріс пайдалануды жою бағытындағы маңызды қадам болды. Осылайша, рәсімнің цифрландырылуы жүйені әділ, ашық және барлық қатысушылардың құқықтарын қорғауға бағытталған етті.