Qazaq Air Атырау мен Орал арасындағы рейстердің неліктен тоқтатылғанын түсіндірді

Қазақстандықтар Атырау – Орал бағытындағы тікелей әуе рейсінің тоқтатылғанына шағымдануда. Оқырмандар рейс кестеден жоғалып кеткенін айтып, оның қайта ашылу мүмкіндігін сұрады, деп хабарлайды Tengri Travel.

Qazaq Air әуе компаниясының мәліметінше, Атырау – Орал – Атырау бағытындағы ұшулар бағыттың шығынды болуына байланысты тоқтатылған. Компания өкілдерінің айтуынша, қолданыстағы билет бағасы тіпті операциялық шығындарды да өтемейді.

«Балама көлік түрлерінің — автобус, пойыз және жеке автокөлік қызметтерінің бағасы әлдеқайда төмен (орта есеппен 5–7 мың теңге шамасында), сондықтан жолаушылардың басым бөлігі соларды таңдайды», — деп түсіндірді компанияның баспасөз қызметі.

Әуе компаниясы бұған дейін сұранысты арттыру мақсатында арнайы тарифтер мен акциялар енгізгенін, алайда бағыттың бәрібір рентабельді болмағанын атап өтті.

Сонымен қатар, шешімге әсер еткен қосымша факторлар ретінде әуежай тарифтерінің өсуі мен валюта бағамының ауытқуы аталды.

«Маршруттық желіні оңтайландыру — мәжбүрлі, бірақ қажет шара», — деді Qazaq Air өкілдері.

Анықтама ретінде: Бұған дейін Көлік министрлігі бұл бағыттағы рейстер аптасына төрт рет орындалғанын хабарлаған еді. 2023 жылдың ақпанынан бастап Орал әуежайын “Орал Аэропорт Холдинг” ЖШС басқарады, оның 51 пайызы қазақстандық инвесторларға, 49 пайызы шетелдік серіктеске тиесілі.

Министрліктің мәліметінше, әуежай алдағы уақытта Астана мен Алматы бағыттарындағы рейстер санын арттыруды жоспарлап отыр.

Бүгін, 11:53