Қазақ қыздарын балағаттаған ресейлік стримерлер Алматыда қамауға алынды

Arasha.KZ парақшасынан алынған деректерге сүйене отырып, Qazaq24.com хабарлама жасады..

Алматыда қазақ қыздарының намысына тиетін балағат сөздер айтқан ресейлік танымал стример Анар Абдуллаев пен Ренатко әкімшілік қамауға алынды. Бұл туралы Arasha.kz порталы қалалық Полиция департаментіне сілтеме жасап хабарлайды.

Ресейлік Sports.ru басылымының мәліметінше, стримерлер Қазақстанда 15 тәулікке қамауға алынған. Олардың ұсталуына тікелей эфир (стрим) кезінде қазақстандық қыздарға айтылған балағат сөздері себеп болған.

Бұл ақпаратты сол сәтте олардың қасында болған Равшан есімді тағы бір стример растады.

«Біз де, достарымыз да сөзімізбен немесе іс-әрекетімізбен ешқандай теріс пиғыл танытқымыз келген жоқ. Жігіттердің айтқан сөздері көңіліне тиген барлық жандардан кешірім сұраймыз», — деді Равшан.

Алматы қалалық Полиция департаментінің баспасөз қызметі бұл деректі ресми түрде растап, екі шетелдік азаматқа қатысты «Ұсақ бұзақылық» бабы бойынша әкімшілік іс қозғалғанын мәлімдеді.

«Аталған тұлғалардың әлеуметтік желіде қоғамдық тәртіп нормаларын және Қазақстан Республикасының қолданыстағы заңнама талаптарын бұзатын бейәдеп сөздер айтқаны анықталды», — делінген ПД хабарламасында.

Іс материалдары Алматы қаласының мамандандырылған ауданаралық әкімшілік сотына жолданды. Сот шешімімен екі құқық бұзушыға да 15 тәулік мерзімге әкімшілік қамауға алу жазасы тағайындалды.

Полиция өкілдері әлеуметтік желідегі әрбір сөз бен іс-әрекет үшін жауапкершілік бар екенін ескертті.

«Интернет кеңістігі жауапсыздық аймағы емес екенін баса айтамыз. Әлеуметтік желілердегі мәлімдемелер мен мінез-құлық қоғамдық орындардағы әрекеттер сияқты құқықтық тұрғыдан бағаланады», — деп түйіндеді ведомство өкілдері.

Оқиғаларды жіберіп алмау үшін Qazaq24.com сайтынан ең өзекті жаңалықтарды қарап отырыңыз.