Қазақ сарбаздарының сүйегі елге қайтарылды

Екінші дүниежүзілік соғыста қаза тапқан қазақ жауынгерлерінің сүйектері елге қайтарылды. Бүгін Қазақстан республикасы Қарулы күштерінің Ұлттық әскери-патриоттық орталығында майдан даласында шейіт болған сарбаздардың сүйектері туған-туыстарына табысталды. 

Маңызды шараға Қорғаныс министрлігінің басшылығы, «Қарулы күштер ардагерлері» ұйымы мен «Атамның аманаты» қоғамдық бірлестігінің өкілдері және «Жас сарбаз» әскери-патриоттық клубының тәрбиеленушілері қатысты. Ресей Федерациясына қарасты Псков облысында жүргізілген далалық іздестіру жұмыстарының арқасында 1101 атқыштар дивизиясының 356-атқыштар полкінің зеңбірек көздеушісі болған, «Қызыл жұлдыз» орденінің иегері, қызылордалық Байбола Рахметов пен қазіргі Түркістан облысы Глинковское ауылының тумасы Мұсақан Қалмырзаевтың сүйектері табылған. Қос сарбаздың сүйегі батырға лайықты құрметпен, туған өңірлерінде жер қойнына табысталмақ.

Марат Нагуманов, Астана қаласы Қарулы күштер ардагерлері қоғамдық бірлестігі төрағасының орынбасары:

- Ресейдің іздеу қозғалысы оның ішінде іздеу тобы Псковский рубеж, екінші тобының аты Обелиск, сосын біздің іздеу топ ол «Атамның аманаты», Қорғаныс министрлігінің ұшқыштары солардың арқасында осы атамыздың Псков облысында қаза болған сүйектері елімізге жеткізілді.

Базаркүл Алтайбаева, жауынгер Байбола Рахметовтың немере қарындасы:

- 2-3 жылдан бері іздеу салып, ол кісінің табылғанына қатты қуаныштымын. Өзі бір шаңырақта 7-8 ұл болған. Соның бәрін Отан соғысына әкеткен. Содан қайтқаны осы кісі. Құдай қаласа, туған жеріне, Қызылордаға апарамыз.