Қазақстан АҚШ арасында әуе рейсі ашылады

Қазақстан мен АҚШ арасында тікелей әуе рейсі ашылады. Екі ел арасында әуе қатынасы туралы келісім жасалды. Сонымен қатар отандық әуекомпания мұхиттан асып, алысқа ұшатын әуе кемелерімен толығады. 

Жолаушыларды тасымалдауға арналған жаңа халықаралық бағыт Астана мен Нью-Йоркті байланыстырады.

Қазақстандықтар енді АҚШ-қа бару үшін қосымша әуе рейстерін пайдаланбай-ақ, тікелей қатынай алады. Біздің елге келуге ниетті америкалықтар үшін де дәл солай. Отандық әуекомпания Астана-Нью-Йорк арасында жолаушы тасымалдайды. Ол үшін америкалық компаниядан Boeing 787-9 Dreamline маркалы 18 ұшақ алынады. Оның 15-сіне қатысты келісімшарт Мемлекет басшысының АҚШ-қа сапары негізінде жасалған. Ал қалған үшеуіне оған дейін тапсырыс берілген. Бұл әуе кемелері қос құрлық арасын мұхит үстімен оңай ұшып өте алады. Алдағы жылы елге солардың екеуі жеткізіледі. Қос мемлекет арасындағы әуе рейстері сол кезден бастап ашуы мүмкін. «Ал қалған ұшақтарды әуекомпания одан кейінгі жылдары алып келеді», - дейді мамандар.

Әділет Көбенов, ҚР КМ Азаматтық авиация комитетінің басқарма басшысы:

- Құқықтық базаны алатын болсақ, әрине, АҚШ-пен тиісті келісімге қол қойылған әуе қатынасы бойынша. Қазір ол ратификациялық күшіне енген. Сол техникалық тұрғыда сай болу үшін тиісті жұмыс жүргізіліп жатыр. Талаптардың бірі – ұшуды жоспарлаған авиакомпанияның қолында сондай тікелей рейстер орындауға қабілеті бар әуе кемесінің болуы. Дәл сондай әуе кемесі – Boeing 787. Ұшулар осы әуе кемелері келгеннен кейін ашылады.

ИКАО елдің авиациялық қауіпсіздігі бойынша аудит жүргізді. Оның ішінде тиісті органдар мен әуежайлардың, елде жолаушы тасымалдайтын отандық және шетелдік авиакомпаниялардың қызметі сараланды. Нәтижесінде Қазақстанның азаматтық авиация саласы халықаралық стандарттарға 95 пайыз сәйкес келген. Ал әлемдегі орташа көрсеткіш 72 пайыз. Елде бұл саланың дамуына дербес авиациялық әкімшілік ұйымының құрылуы оң ықпал етті. Оған отандық және шетелдік білікті мамандар тартылған. Олар әуежайлар мен авиакомпаниялардың техникалық жай-күйін тұрақты тексеріп отырды. 

Әділет Көбенов, ҚР КМ Азаматтық авиация комитетінің басқарма басшысы:

- Ортаәлемдік және ортаеуропалық көрсеткіштермен салыстырсақ, ол едәуір жоғары. Айта кету керек, бұл нәтиже авиация саласында жүргізілген кешенді реформалардың нәтижесінде жүзеге асты. Алдыңғы аудитте, 2017 жылы 83 пайыз болған. Яғни 12,7 пайыз жоғары көрсеткішке қол жеткізілген.

Астанада еуропалық деңгейдегі авиациялық оқу орталығы ашылады. Қазақстанның Көлік министрлігі мен Франция Азаматтық авиация ұлттық мектебі ынтымақтастық туралы келісімге келді. Жаңа мекеме саладағы заманауи білім беру стандарттарының өңірлік орталығына айналуы ықтимал. Нәтижесінде шетелдік оқу орындарына тәуелділік азайып, отандық білікті кадрлар көбейеді. Кейінгі жылдары елде әуе компанияларының техникалық паркі кеңейіп, жаңа рейстер артып жатыр. Сәйкесінше маман тапшылығы өзекті болып тұр. Көлік министрлігінің мәліметіне қарағанда, салада жыл сайын 500-ден астам кадр жетіспейді. Оның ішінде ұшқыштар, инженерлер және әуе қозғалысын бақылау диспетчерлеріне сұраныс көп.

Биылғы он айдың статистикасы бойынша, елде әуе кемелері 27 миллионға жуық жолаушы тасымалдаған. Бұл былтырғы дәл осы кезеңмен салыстырғанда сегіз пайызға көп. Жолаушылардың тең жартысына отандық компаниялар қызмет көрсетті.