Қазақстан криптоактивтерге 700 млн доллар инвестиция салмақ

Қазақстан криптоактивтерге инвестиция салу мүмкіндігін қарастырып жатыр. Бұл бастама Қазақстан Республикасының Ұлттық Банкі күн тәртібіне енгізіліп, қазір оның негізгі параметрлері пысықталуда.

Ресми мәліметке сәйкес, алғашқы кезеңде шамамен 700 млн доллар көлемінде цифрлық активтер портфелін қалыптастыру жоспарланып отыр. Оның 350 млн доллары алтын-валюта резервтерінен, тағы 350 млн доллары Ұлттық қор қаражатынан бөлінуі мүмкін. Бұл сома аталған активтердің жалпы көлемінің шамамен 0,5 пайызына тең.

Ұлттық банк бұл қадам халықаралық резервтердің тұрақтылығы мен өтімділігіне кері әсер етпей, қарқынды дамып келе жатқан цифрлық нарыққа қатысуға жол ашатынын атап өтті. Болашақта криптоактивтерге салынатын инвестиция көлемін 1 млрд долларға дейін ұлғайту мүмкіндігі де қарастырылып отыр.

Жоспарға сәйкес, инвестициялар шектеулі әрі нақты тәуекел деңгейі белгіленген портфель аясында жүзеге асады. Негізгі назар әртараптандыруға аударылып, тек криптовалюталар ғана емес, сонымен қатар туынды қаржы құралдары мен криптоиндустрияда жұмыс істейтін компаниялардың акциялары да қамтылуы ықтимал.

Инвестициялық портфельді басқару Ұлттық инвестициялық корпорация еншісіне берілмек. Ал цифрлық активтерді есепке алу және сақтау қызметін Бағалы қағаздардың орталық депозитарийі жүзеге асырады. Портфельдің тиімділігі жыл сайын бағаланып отырады.

Сондай-ақ Үкімет тәркіленген цифрлық активтерді ұлттық крипторезерв құрамына енгізу және оларды пайдалану тетіктерін де қарастыруда. Жалпы, мұндай бастама халықаралық резервтерді әртараптандырумен қатар, елдің цифрлық инфрақұрылымын дамытуға бағытталған маңызды қадамдардың бірі болмақ.