Қазақстан мемлекеттік бағалы қағаздарын NYSE орналастыруы мүмкін

Дүниежүзілік банк пен ХВҚ-ның жыл сайынғы сессияларына қатысу аясында вице-премьер – ұлттық экономика министрі Серік Жұманғарин бастаған қазақстандық делегация Нью-Йорк қор биржасына (New York Stock Exchange, NYSE) барды. Бұл туралы ҚР Үкіметінің баспасөз қызметі хабарлады. 

Кездесу барысында NYSE стратегиялық операциялар және корпоративтік қатынастар департаментінің басшысы Уилл Гудвин биржаның қызметі мен негізгі бағыты туралы айтып берді.

"NYSE өкілдері Қазақстан Республикасының мемлекеттік бағалы қағаздарын орналастыру мүмкіндігіне, сондай-ақ мемлекеттің қатысуымен ірі ұлттық компаниялардың биржаға шығу перспективасына байланысты барлық сұрақтарға егжей-тегжейлі жауап беріп, сауда-саттықты ұйымдастыру және эмитенттермен өзара әрекеттесу саласындағы тәжірибесімен бөлісті", деп жазды Үкіметтің баспасөз қызметі. 

Сапар соңында делегация сауда залының жұмысымен және биржаның жұмыс істеу тетігімен танысты.